Almatyda órtengen jer úıden gaz ballondary shyǵaryldy

ALMATY. QazAqparat – Almatyda jeke menshik sektorda órt boldy, dep habarlaıdy QazAqparat tilshisi.

Almaty qalalyq Tótenshe jaǵdaılar departamentiniń málimetinshe, órt búgin Jetisý aýdanynda, Raıymbek dańǵyly, Galıleı 38 mekenjaıynda boldy.

«Saǵat shamamen 15:04-te órt sóndirýshiler shaqyrtýǵa shyqty. Olar kelgende jekemenshik úı men qoranyń órtenip jatqany anyqtaldy. Órttiń kórshi úıge ótý qaýpi boldy. Jaqyn jerde ornalasqan órt sóndirý gıdranttaryna avtotsısternalar ornatylyp, úzdiksiz sýmen qamtamasyz etilip, órttiń taralý qaýpi joıyldy. Órt ornynan 25 lıtrlik 5 gaz ballony evakýatsııalandy», - dep habarlady vedomstvonyń baspasóz qyzmeti.

Oqıǵa ornynda 10 birlik tehnıka men 26 adam jumyldyryldy. Órt saǵat 35 mınýtta aýyzdyqtalyp, 15:46-da sóndirildi.

Órttiń shyǵý sebebi anyqtalýda.