Almatyda órtengen úıde qalyp qoıǵan 93 jastaǵy keıýana qutqaryldy

ALMATY. QazAqparat - Almatylyq qutqarýshylar órtengen úıden 93 jastaǵy keıýanany qutqarý sáti túsip qalǵan vıdeony jarııalady, dep habarlaıdy QazAqparat.

22 jeltoqsan saǵat 13:51 kezinde Túrksib aýdany Bakınskaıa kóshesindegi jeke turǵyn úıde órt shyqqany týraly habar túsken.

Onda jalpy aýdany 60 sharshy metr aýmaqta jeke turǵyn úıdiń shatyry janyp jatty. Jaqyn mańdaǵy úıge de qaýip tóndi.

Qutqarýshylar 4 mınýtta keldi. Olar 1929 jyly týǵan ájeni úıden alyp shyqty.

Órt 14:15-te oqshaýlanyp, 14:27-de sóndirildi.

Aǵa ınjener Turan Asylhan terezeni syndyryp jatqanda, kómekke kelgen bólimshe komandıri Sanjar Taısarıev men órt sóndirýshi Nurjan Janqorazov esikterdi ashyp, qulyptalǵan bólmege kirdi. Onda egde jastaǵy áıel boldy.

Qarııa úıde ne bolyp jatqanyn túsinbedi.

Olar keıýanany kóterip, taza aýaǵa alyp shyqty. Sosyn ári qaraı tekserý úshin jedel medıtsınalyq járdem brıgadasyna tapsyrdy.

Dárigerlerdiń qaraýynan keıin 93 jastaǵy áje týystaryna berildi. Onyń ómiri men densaýlyǵyna qaýip joq.