Almatyda órtengen úı ishinde qamalyp qalǵan jasóspirim qutqaryldy

ALMATY. QazAqparat – Almatyda qutqarýshylar 14 jasar qyzdy órtenip jatqan úıden aman alyp shyqty, dep habarlaıdy QazAqparat tilshisi.

Almaty qalalyq tótenshe jaǵdaılar departamentiniń málimetinshe, órt Jetisý aýdany Venetsıanov kóshesinde ornalasqan №65 úıden shyqqan. Oqıǵa ornyna órt sóndirý jasaqtary joǵary dárejedegi shaqyrtý boıynsha jiberildi.

«Mamandandyrylǵan jasaq bólimsheleri oqıǵa ornyna tórt mınýtta jetti. Qutqarýshylar jalpy alańy 80 sharshy metr bolatyn shatyry bar úıdiń órtenip jatqanyn anyqtady», - dep habarlady vedomstvodan.

Órtti barlaý jáne sóndirý barysynda mamandandyrylǵan jasaq jáne №8 órt sóndirý bóliminiń mamandary úıdiń ishinen 2008 jyly týǵan qyzdy tapty.

«Ol turǵyn úıge japsarlas salynǵan bólmede qamalyp qalǵan. Shyǵatyn jol jabyq. Terezesi metall tormen jabylǵan. Qutqarýshylar esikti ashyp, oqýshy qyzdy syrtqa shyǵardy. Jasóspirimdi dárigerler tekserdi, ómirine eshqandaı qaýip joq», - dep atap ótti departamentten.

Órtti sóndirýge 9 tehnıka, jeke quramnan 36 adam jumyldyryldy.

Vıdeodan alynǵan kadr