Almatyda ortalyq pen shetki aýdandardy baılanystyratyn 2 metro stantsııasy iske qosyldy
Almaty ákiminiń aıtýynsha, olar qazirgi qyzmet kórsetip turǵan toǵyz stantsııanyń jalǵasy retinde qala ortalyǵyn shetki aýdandarmen baılanystyrady.
«Bul-bizdiń megapolıs úshin kópten kútken qýanyshty oqıǵa. Metropolıteniniń qurylysshylary men qyzmetkerleri sizder jergilikti jerdiń kúrdeli taý-geologııalyq jáne seısmıkalyq jaǵdaılaryn eskere otyryp, óte jaqsy jumys jasadyńyzdar. Men buny bizdiń qalamyz ben turǵyndarymyz úshin óte mańyzdy oqıǵa dep sanaımyn. Másele 50 myńnan 85 myńǵa deıin ulǵaıatyn jolaýshylar leginde ǵana emes, qalanyń áldeqaıda jaıly bolatyndyǵynda, bárimizdi alańdatyp otyrǵan trafıktiń durys sheshim tabatyndyǵynda»,- dedi metro stantsııalarynyń ashylý saltanatynda qala ákimi Erbolat Dosaev.
Qala basshysynyń sózinshe, megapolıste metro jelisin keńeıtý boıynsha aýqymdy jumystar jalǵasady. 2025 jyly «Qalqaman» stantsııasynyń qurylysyn aıaqtaý josparda. Metro jelisin damytý batys baǵytta «Barlyq» bazaryna deıin ulǵaıady. Bul aýdandar turǵyndary úshin yńǵaıly jolaýshylar tasymalyn uıymdastyrýǵa múmkindik beredi.
Metro stantsııalarynyń ashylý saltanatyna Baýyrjan Momyshulynyń kelini Zeınep Ahmetova da keldi.
«Atamyz ómirden ketkenine 40 jyl boldy, biraq áli kúnge deıin halyq áli ardaqtap, qurmettep, aspandatyp, kóshelerdiń atyn, mektepterdiń atyn berip, búgingi shara da, atamyz áli tirilerdiń arasynda júretin bir belgisi. Bir nársege men tańǵalyp jatyrmyn. Myna Almatyda metro ashylǵannan keıin, men áli bir de bir ret qadam baspadym. Atamnyń atyna bergende keldim»,- deıdi Zeınep Ahmetova.
Ótken jyly Almaty metropolıteni óziniń alǵashqy úlken jáne mańyzdy mereıtoıyn – on jyldyǵyn atap ótti. Osy ýaqyt ishinde bilikti eńbek ujymy qurylyp, jas mamandar oqytylyp, daıyndaldy.
Eki stantsııanyń iske qosylýymen qosymsha 200 jumys orny ashyldy.