Almatyda Ortalyq Azııa qolóner sheberleriniń kórme-jármeńkesi ótedi

ALMATY. QazAqparat – Almatydaǵy QR Ortalyq memlekettik mýzeıinde «Altyn alma» kórme-jármeńkesi ótedi. Bul týraly qala ákimdiginiń baspasóz ortalyǵynda ótken brıfıngte «Baqyt» dekoratıvti-qoldanbaly óner ortalyǵynyń menedjeri Kúnsulý Ábdikárim aıtty, habarlaıdy QazAqparat tilshisi.

Uıymdastyrýshylardyń aıtýynsha, kórme-jármeńke taqyryptyq ataýlar boıynsha bir jylda tórt ret ótedi: kóktemde – «Qyzǵaldaqtar ýaqyty», jazda - «Jibek joly», kúzde - «Altyn alma» jáne qysta - «Shyǵys bazary».

«Altyn alma» kórme-jármeńkesi bıylǵy 4-6 qazan aralyǵynda uıymdastyrylady.

«Mundaı sharalar Ortalyq Azııa elderi arasynda ekonomıkalyq jáne mádenı baılanystardy damytýda úlken mańyzǵa ıe. Almaty bir jyl ishinde birneshe ret túrli memleketterdiń qoldanbaly óner sheberleriniń ortalyǵyna aınalady», - dep atap ótti Ortalyq memlekettik mýzeıdiń baspasóz hatshysy Aqmaral Aıdynbaeva.

Kórmege Qazaqstan, Qyrǵyzstan,Tájikstan,Túrikmenstan, Ózbekstan, Reseı men Grýzııanyń sheberleri jasaǵan túrli buıymdar men kádesyılar qoıylady. Atap aıtsaq, kıim-keshek, panno, gobelender, kıiz ben teriden jasalǵan buıymdar, toqylǵan zattar, zergerlik buıymdar jáne taǵy basqalary.

Usynylatyn kádesyılardyń negizgi taqyryby – almalar. Óıtkeni, alma – Almatynyń basty sımvoly.

Sondaı-aq, dekoratıvti-qoldanbaly óner boıynsha sheberlik sabaqtar ótetini josparlanǵan.

Foto: almaty.gov.kz