Almatyda Ortalyq Azııa ǵalymdary mádenıetter dıalogyn talqylap jatyr
Forým Qazaqstan Prezıdenti Nursultan Nazarbaevtyń bastamasymen 2018 jyldyń naýryz aıynda ótken Ortalyq Azııa elderi basshylarynyń konsýltatıvtik jumys kezdesýi aıasynda ótkizilip otyr.
Qazaqstan, Qyrǵyzstan, Ózbekstan, Tájikstan men Reseıdiń kórnekti mádenıettanýshy-ǵalymdary, tarıhshylar Ortalyq Azııa órkenıetindegi ortaq mádenıet pen dástúr, mádenı ártúrlilikti damytý, túrli mádenıetter dıalogy tóńireginde áńgime órbitýde.
«Sonaý kóne zamannan beri Orta Azııa halyqtarynyń taǵdyry, tili, dini ortaq. Olardyń arasynda mádenı baılanys óte kúshti. Ásirese kóneden kele jatqan Uly Jibek joly boıynda ornalasqan Orta Azııa halyqtarynyń tarıhy, óneri, mádenıeti, arheologııasy, óneri uqsas. Bul elderdiń barlyǵy qazir táýelsizdik aldy. Olardyń búgingi dárejesi qandaı? Qazaqstannyń yqpaly, aradaǵy baılanysy qandaı? Búgingi forýmda osy máseleni jan-jaqty talqyǵa salamyz», - dedi Mádenıetterdi jaqyndastyrý ortalyǵynyń bas ǵylymı qyzmetkeri, jazýshy Naǵashybek Qapalbekuly.
«Ortalyq Azııa halyqtary mádenıetiniń dıalogy forýmy Qazaqstanda ótip jatqanynyń ózi elimizdiń beıbitshilik pen kelisimge beıimdigin kórsetse kerek. Búgingi tańda qoǵamda dinaralyq, qoǵamdyq kelisimge qajettilik týǵan zamanda Ortalyq Azııanyń kóne jádigerleri men kóne muralaryna qyzyǵýshylyq artyp keledi. Ortalyq Azııada myńjyldyqtar boıy túrli ult pen ulystar, dinder qalyptasyp keledi: Búgin de kóz aldymyzda Uly Jibek jolyna qaıta jan bitip jatyr», - dedi QR Mádenıet jáne sport mınıstrliginiń ókili Nurbek Boranbaev.
Aıta ketý kerek, shara aıasynda Qazaqstandaǵy túrli etnos ókilderiniń ulttyq qoldanbaly óneriniń kórmesi ashyldy. Kórmede túrli etnomádenı birlestikterdiń ulttyq dástúrleri, kıimderi, salttary, buıymdary kórinis tapty.