Almatyda órt kezinde qaza tapqan áıeldiń otbasyna eki bólmeli páter beriledi

ALMATY. QazAqparat- «Aqkent» turǵyn keshenin salýshy kompanııa qaza tapqan Ásel Bekmuhambetovanyń otbasyna eki bólmeli páter beredi, dep habarlaıdy QazAqparat tilshisi.

«Aqkent» turǵyn úı keshenin salǵan «Ayt housing Complex» JShS qaza tapqan áıeldiń otbasyna óteýsiz negizde eki bólmeli páter beredi.

«Kompanııa atynan Ásel Bekmuhambetovanyń týystary men jaqyndaryna kóńil aıtamyz. Marqumnyń ápkesi Aıjannyń tezirek saýyǵyp ketýin tileımiz»,- dep habarlady qurylys kompanııasynan.

«Ayt housing Complex» qurylys kompanııasynyń bas dırektory Qanat Eralıev kompanııa órt shyqqan úıdi qalpyna keltiretinin atap ótti.

«Biz óz bastamamyzben úıdi qalpyna keltirý shyǵynyn moınymyzǵa alýǵa daıynbyz», - dedi ol.

Belgili bolǵandaı, otqa oranǵan úıdi atalǵan kompanııa salǵan.

Kóppáterli turǵyn úı 2017 jyly paıdalanýǵa berildi.

«2020 jyldyń qańtaryna deıin bul úı bos turdy. «Ayt housing Complex» JShS bul úıdiń tapsyrys berýshisi jáne menshik ıesi emes. Bul úıge turǵyndar tek 2020 jyly qonystandy, úıdiń ıesi jańardy. Atalǵan turǵyn úı kesheninde qyzmet kórsetetin basqarý organy - «Aqkent TK» MIB (OSI). Ótken jyldyń naýryz aıynda MIB «Ayt Facility Management» JShS atynan basqarýshy kompanııamen shart jasasty, onyń dırektory - G.S. Majenov»,- delingen «Ayt housing Complex» JShS baspasóz qyzmeti taratqan habarlamada.

Lıftilerge keletin bolsaq, bul turǵyn úıde Mitsubishi lıftiniń brendi 2015 jyldan bastap jumys isteıdi, tirkeý nómiri L15-269 jáne L15-270.

«AG MELЬKO Elevator Kazahstan Kompanı» JShS lıft kompanııasy qyzmet kórsetedi.

Lıftilerdi sońǵy tehnıkalyq kýálandyrý 2023 jyldyń 27 shildesinde júrgizildi.