Almatyda óndiristik sektorǵa ınnovatsııalyq IT jáne hımııa-tehnologııalyq zertteýlerdi engizýge arnalǵan ǵylymı-tájirıbelik konferentsııa ótti
dep habarlaıdy «KAZENERGY» qaýymdastyǵynyń baspasóz qyzmeti.
Atalmysh konferentsııanyń maqsaty - óndiristik úrdisterdi ǵylymmen ushtastyrý tetigin engizip, ǵylymı jańalyqtardy ıgerý. Sonymen qatar, Údemeli ındýstrııalyq-ınnovatsııalyq damý baǵdarlamasyna sáıkes jańa ónimderdi shyǵarý jáne óndiris sektorynda eńbek ónimdiligin arttyrý mehanızmin meńgerý.
Konferentsııa jumysyna metallýrgııa jáne hımııa óndirisindegi kompanııalar men KAZENERGY qaýymdastyǵyna múshe munaı-gaz kompanııalary belsene aralasty. KBTÝ men birneshe óndiristik ónerkásiptiń arasynda Memorandýmǵa qol qoıyldy.
Jıynǵa qatysýshylarǵa joldaǵan sózinde «Samuryq-Qazyna» ál-aýqat qory tóraǵasynyń orynbasary, «KAZENERGY» qaýymdastyǵynyń tóraǵasy Tımýr Qulybaev: «Elbasy qarqyndy ındýstrııalyq-ınnovatsııalyq damý baǵdarlamasyn bekitti jáne búgingi konferentsııa sol baǵdarlamany iske asyrýdaǵy qadamnyń biri. «Samuryq-Qazyna» qoryna kiretin kompanııalar úshin de, jalpy bıznes qaýymdastyq úshin de bul baǵdarlama eki baǵytta eńbek etýge negiz bolyp otyr. Birinshisi - óndiris sektorynda eńbek ónimdiligin arttyrý, ekinshisi - jańa ónim túrlerin shyǵarý.
Bul maqsatqa jetý úshin óndiriske tehnologııalyq jańalyqtardy engizip, ónerkásip pen ǵylymnyń arasyn jaqyndata túsý kerektigi anyq. Zamanaýı ǵylymı jańalyqtardy meńgermeıinshe, ónerkásipti dıversıfıkatsııalap, eldiń básekelestigin arttyrý múmkin emestigin jadymyzdan shyǵarmaǵanymyz abzal.
A.B. Bekturov atyndaǵy Hımııa ǵylymdarynyń ınstıtýty men D.V. Sokolskıı atyndaǵy Organıkalyq katalız jáne elektrohımııa ınstıtýtynyń KBTÝ quramyna kirgenin eskersek, biz ǵylymı jańalyqtyń óndiriske engizilý úderisin tezdetemiz. Endigi maqsatymyz - osy bastamany jańa deńgeıge kóterý, ol úshin Qor tarapynan qajetti qarjylyq kómek kórsetiledi. Instıtýttarymyzdy qaıta jańǵyrta otyryp, biz olardyń áleýeti men ekonomıkaǵa ákeletin paıdasyn arttyramyz.
Osylaısha, tek birlesken jumys arqyly ǵana ónerkásipter men ǵylymı ınstıtýttar ındýstrııalyq-ınnovatsııalyq damýǵa qol jetkize alady»,- dep atap ótti óz sózinde Tımýr Qulybaev.