Almatyda Oljas Súleımenov jaıly jazylǵan kitaptyń tanystyrylymy boldy
Tusaýkeser rásimi Á.Qasteev atyndaǵy memlekettik óner murajaıynda ótti. Sharaǵa belgili óner, qoǵam qaıratkerleri, stýdentter, BAQ ókilderi qatysty.
Jıyndy ashqan «TÚRKSOI» uıymynyń bas hatshysy Dúısen Qaseıinov tanymal aqyn, qoǵam qaıratkeri, Eńbek Eri Oljas Súleımenovty jańa týyndynyń shyǵýymen quttyqtap, izgi tilegin bildirdi.
Á.Qasteev atyndaǵy memlekettik óner murajaıynyń dırektory Gúlmıra Shalabaeva «kitaptyń avtory ári demeýshisi «TÚRKSOI» uıymynyń bas hatshysy Dúısen Qaseıinov, al baspageri Berik Barysbekov» ekenin atap ótti.
«Bul týyndydaǵy ár óleń aǵylshyn tilinde jazylǵan, sebebi, álemdi qazaq halqynyń mádenıetimen tanystyrý kerek boldy. 2000 danamen basylyp shyqqan kitap dúnıejúzine tarap ketti. Sondaı-aq, ár óleń sýretpen birge berilgen. Mundaǵy maqsat- oqyrmannyń sana-sezimin oıatýǵa arnaldy. Munda Salıhıtdın Aıtbaev, Evgenıı Sıdorkın, Dosbol Qasymov, Meıirjan Nurǵojın, Nıkolaı Gazeevpen basqa da túrkitektes elderdiń sýretshileriniń eńbekteri jınaqtalǵan», - dedi Gúlmıra Shalabaeva.
Baspager Berik Barysbekov kitaptyń Oljas Súleımenovtyń 85 jyldyǵyna oraı shyǵarylǵanyn aıtty.
«Jaryqqa shyǵararda Oljas Súleımenovpen kóp aqyldastym. Biz oǵan kitaptyń maketin usynǵanda qatty qýandy. Sonymen qatar, bul avtordyń ózi alǵysózin jazǵan jalǵyz týyndy», - dedi baspager.
Oljas Súleımenov óz sózinde «TÚRKSOI» uıymynyń elder arasynda tatýlyqty ornatýda eńbegi úlken ekenin atap ótti.
«Baspager Berik Barysbekov eńbegi arqyly qazaqtyń, shyǵystyń áıgili tulǵalaryna eskertkish ornatty dese bolady. Árıne, mundaı jumystar «TÚRKSOI» qamqorlyǵymen jasaldy. Bular osy izgi dástúrdi jalǵastyrsa deımin. Jalpy, mádenıetterdiń jaqyndasýy «TÚRKSOI»-dy qosa alǵanda, ıÝNESKO men basqa da álemdik uıymdardyń máńgilik taqyryby bolyp qala beredi», - dedi aqyn, qoǵam qaıratkeri.