Almatyda oqý jyly bastalǵaly 39 baladan týberkýlez anyqtaldy

ALMATY. QazAqparat - Almatyda 1 qyrkúıekten bastap 1-synyp oqýshylaryna týberkýlezge qarsy ekpe egý naýqany júrgizildi, dep habarlaıdy QazAqparat tilshisi Almaty qalasynyń sanıtarııalyq-epıdemıologııalyq baqylaý departamentine silteme jasap.

Vedomstvonyń málimetinshe, balalarǵa mantý egý naýqanynyń qorytyndysy boıynsha 6182 baladan (22,7%) oń nátıje anyqtaldy.

«Oń nátıje anyqtalǵan 6182 balaǵa rekombınantty týberkýlez allergeni (RTA) synamasy jasaldy. Nátıjesinde týberkýlez mıkobakterııalaryn alǵash ret juqtyrǵan 39 bala anyqtaldy. Olarǵa profılaktıkalyq em taǵaıyndaldy»,- delinedi habarlamada.

Vedomstvo málimetinshe, balalarda týberkýlezdiń damýynyń birden bir sebebi - týberkýlezben aýyratyn naýqaspen uzaq qarym-qatynasta bolý. Sol kezde balanyń aǵzasy mıkobakterııalardy juqtyrady.

«Megapolıstiń epıdemıologtary týberkýlezdi sátti emdeýdiń bir sharty - aýrýdy erte anyqtaý ekenin eske salady. Aýrýdy erte anyqtaý úshin týberkýlezden saqtanyp, aýrýdyń belgilerin bilý jáne der kezinde dárigerge qaralý qajet»,- dep eskertti qalalyq sanıtarııalyq-epıdemıologııalyq baqylaý departamenti.