Almatyda Nurtileý Imanǵalıuly atyndaǵy aýdıtorııa ashyldy
Sharaǵa Aqparat jáne qoǵamdyq damý mınıstri Aıda Balaeva, ál-Farabı atyndaǵy Qazaq ulttyq ýnıversıtetiniń rektory Janseıit Túımebaev, jýrnalıstiń jubaıy Qarlyǵash Tabýldınova, belgili qoǵam qaıratkerleri, stýdentter men BAQ basshylary qatysty.
Aqparat jáne qoǵamdyq damý mınıstri Aıda Balaevanyń aıtýynsha, Nurtileý Imanǵalıuly eńbek jolyn qatardaǵy tilshiden bastap joǵary jaýapty qyzmetterge deıin ósti. Kórermenniń súıikti telejúrgizýshisine aınaldy. Bul bıikke ol talantymen, darynymen, eńbekqorlyǵymen jetti.
«Nurtileý Imanǵalıuly óziniń tereń bilimimen, azamattyq ustanymymen qyzmetine adal, aınalysyna syıly, áriptesterine úlgi bola bildi.Tek saýatty telejúrgizýshi ǵana bolǵan joq. Qazaq televızııasy salasynda ózindik mektep qalyptastyra bildi. Ózine qarap boı túzegen jas jýrnalıster qatarynan qanshama býyn shákirt tárbıeledi», - dedi mınıstr.
Sonymen qatar, ol elimizdegi jýrnalıstıka fakýltetiniń stýdentterine «Nurtileý Imanǵalıuly» atyndaǵy arnaıy stıpendııa taǵaıyndalǵanyn aıtty.
«Parlament Senaty uıymdastyrǵan «Amanat» konkýrsy aıasynda «Nurtileý Imanǵalıuly» atynda jýrnalısterge arnalǵan arnaıy premııa bekitildi. Televızııa ardageriniń atynda voleıboldan týrnır ótkizildi. Búgin Nurtileý Imanǵalıulynyń qurmetine arnalǵan kezekti is-sharanyń kýási bolyp otyrmyz. Bul – zııaly azamatqa degen qoǵamnyń qurmetin kórsetedi. Búgingi is-shara birinshiden ortamyzdan ózi ketse de, artynda úlgi bolatyn isi qalǵan áriptesimizdiń rýhyna qurmet kórsetý. Ekinshiden, bul stýdentter úshin de úlken jaýapkershilik. Endigi jerde bul qatardaǵy jaı aýdıtorııa emes. Syıly azamattyń esimi berilgen – oqý zerthanasy. Munda stýdentter teorııalyq bilimmen qatar, praktıkaǵa da úırenetin bolady. Sondyqtan osynda bilim alatyn árbir stýdent jýrnalıst aǵalarynyń esimin kirletpeı, laıyqty deńgeıde oqıdy dep senim bildiremin», - dedi Aıda Balaeva.
Ál-Farabı atyndaǵy Qazaq ulttyq ýnıversıtetiniń rektory Janseıit Túımebaev Nurtileý Imanǵalıulynyń qyzmetine toqtaldy.
«Eńbek jolyn qazaq televızııasynyń «Jastar» redaktsııasynda qatardaǵy tilshi bolyp bastap, tereń bilimimen, izdenimpazdyǵymen bıik belesterdi baǵyndyrdy. «Habar» agenttiginde, Úkimet keńsesinde, Prezıdent Ákimshiliginde jaýapty qyzmetter atqardy. Respýblıkalyq «Qazaqstan» tele-radıo korporatsııasyn basqaryp, zeınetke shyqqanǵa deıin Basqarma tóraǵasynyń keńesshisi boldy.
Nurtileý Imanǵalıuly sanaly ǵumyrynyń jarty ǵasyryn televızııaǵa arnady. Ekran arqyly halyqtyń sózin jetkizip, ult zııalylaryn elge tanytyp, ózi de eren eńbegimen kópke tanyldy.Naǵyz jýrnalıst qaıda júrse de qolynan qalamy túspeıtin – jańalyqtyń jarshysy, halyq pen bıliktiń arasyndaǵy altyn kópir.El men jer, memleket pen ult degende jan aıamaı eńbek etken Nurtileý Imanǵalıulynyń ǵıbratty ǵumyry sonyń naqty dáleli. Jýrnalıstıka fakýltetinde dáris alyp júrgen bolashaq jýrnalıster osyndaı kásibı bilikti mamandardyń shyǵarmashylyǵyn tereńdeı zertteıtin kúnder áli alda», - dedi rektor. Jınalǵandarǵa Nurtileý Imanǵalıulynyń qyzmeti men shyǵarmashylyǵyna arnalǵan «Nur - Tiley» estelik beınefılm kórsetildi. Sondaı aq oqý ornynda «Nurtileý Imanǵalıuly – ulttyq televızııanyń qaıratkeri» atty fotokórme uıymdastyryldy.
Eske salaıyq, Qazaq televızııasynda 35 jyl qyzmet atqarǵan jýrnalıstıka ardageri Nurtileý Imanǵalıuly bıyl 17 aqpan kúni ómirden ótti .
Nurtileý Imanǵalıuly «Qurdastar», «Jastar daýysy», «Araı», «Jadyńda ma, joldas», «Aına», «Jas jiger»,«Betpe-bet», «Qoltańba», «Dińgek», «Kórshiler», «Zań sóılesin», «Nur-Tiley» avtorlyq baǵdarlamalary arqyly qalyń kórermen esinde qaldy.
Nurtileý Imanǵalıuly 1952 jyly 1 mamyrda Almaty oblysy Aqsý aýdanynda dúnıege kelgen. Qazaq televızııasynda tilshi, redaktor, aǵa redaktor, kommentator, bas redaktor, saıası sholýshy, dırektordyń orynbasary, «Habar» agenttiginde moderator-júrgizýshi, odan keıin Úkimet keńsesinde sektor meńgerýshisi, Prezıdent Ákimshiliginde bas maman bolyp istegen.
Aıta keteıik, Nurtileý Imanǵalıuly 2006-2007 jyldary – «Qazaqstan» respýblıkalyq teleradıokorporatsııasy» aktsıonerlik qoǵamynyń basqarma tóraǵasy, odan keıingi jyldary «Qazaqstan RTRK» AQ basqarma tóraǵasynyń keńesshisi qyzmetterin atqardy. Sońynda izbasar shákirtter tárbıeledi.