Almatyda nurotandyqtar áleýmettik nysandarǵa monıtorıng júrgizdi

ALMATY. QazAqparat – Almatyda nurotandyqtar áleýmettik nysandarǵa monıtorıng júrgizdi. Tekserý barysynda partııa ókilderi qurylys jumystaryn sapasyz júrgizgen merdiger kompanııalarǵa eskertý jasady, dep habarlaıdy QazAqparat tilshisi.

«Nur Otan» partııasy Almaty qalalyq fılıalynyń partııalyq baqylaý komıssııasynyń músheleri Bostandyq aýdanyndaǵy «Qutty meken» partııalyq jobasy aıasynda qalanyń áleýmettik ınfraqurylym tizimine engen eki nysanǵa bardy. Atap aıtar bolsaq, №40 orta mektep jáne №81 mektep-gımnazııasy.

Tekserý barysynda nurotandyqtar merdiger kompanııaǵa qurylys sapasynyń tómendigin aıtty. Sonymen qatar, merdiger uıymnyń 5 aıdaǵy jumysshylar aldyndaǵy qaryzy anyqtaldy.

Sondaı-aq, óndiris kestesinen artta qalý jáne jumys jobasyna sáıkes kelmeý faktileri tirkeldi. Osyǵan baılanysty sol jerde tehnıkalyq keńes ótkizildi, qorytyndy boıynsha tapsyrys berýshi men bas merdiger ókilderin habardar ete otyryp, eskertý berildi. Sonymen qatar, reıd qorytyndysy boıynsha nurotandyqtar tapsyrys berýshiniń atyna jáne anyqtalǵan eskertýlerdi joıý boıynsha Qala qurylysyn baqylaý basqarmasyna usynys hat joldady.

Ekinshi qurylys nysanynda jumystardyń aıaqtalý merzimi boıynsha artta qalýshylyq baıqalady. Merdiger uıymnyń ınjeneri Erlan Omarov muny karantın kezinde jumystardyń basym bóligi toqtatylǵanyn, bul nysandaǵy jumystardyń taǵy eki aıǵa artta qalýyn túsindirdi.

Sondaı-aq, tekserý barysynda komıssııa músheleri otandyq óndiristiń qurylys materıaldaryn satyp alýǵa nazar aýdardy.

Jalpy, Bostandyq aýdanynda «Qutty meken» partııalyq jobasyn júzege asyrý boıynsha toǵyz nysan partııalyqtardyń baqylaýynda.

Aıta keteıik, bul joba QR Tuńǵysh Prezıdenti – Elbasy Nursultan Nazarbaev bastamasymen júzege asýda.