Almatyda Nurǵısa Tilendıevtiń 85 jyldyǵyna arnalǵan kontsert ótti

ALMATY. Sáýirdiń 6-sy. QazAqparat /Názıra Eleýhan/ - Keshe Almatyda Qazaqtyń Abaı atyndaǵy memlekettik opera jáne balet teatrynda Qazaqstannyń jáne KSRO-nyń halyq ártisi, Halyq qaharmany Nurǵısa Tilendıevtiń 85 jyldyǵyna jáne Uly Jeńistiń 65 jyldyǵyna arnalǵan, Nurǵısa Tilendıev atyndaǵy memlekettik akademııalyq folklorly-etnografııalyq «Otyrar sazy» orkestriniń «Nurǵısanyń saǵyndyrǵan ánderi-aı» dep atalatyn kontserti bolyp ótti,

dep habarlaıdy QazAqparat.

Mádenıet mınıstrligi, Almaty qalasy ákimdigi jáne N.Tilendıev atyndaǵy halyqaralyq qordyń uıymdastyrýymen ótken kontsertte elimizdiń halyq ártisteri Maıgúl Qazturǵanova, Sara Tynyshtyǵulova, Qazaqstannyń eńbek sińirgen ártisteri Jámıla Baspaqova, Ermek Ábildaev, halyqaralyq, respýblıkalyq baıqaýlardyń laýreaty Dına Hamzına, N.Tilendıev atyndaǵy baıqaýdyń jeńimpazy Murager Saýranbaev jáne taǵy basqa ánshiler uly tulǵanyń ánderin oryndap, ánmen shashý shashty. Sonymen qatar, kontsert barysynda halyq kúıleri, Nurǵısa Tilendıevtiń «Mahambet», «Kósh kerýen», «Nursultan», «Aqqý», «Uly toı» jáne taǵy da basqa qaıtalanbas kúıleri oryndaldy. Atalmysh kontsert Nurǵısa Tilendıevtiń qyzy Dınara Tlendıevanyń kórkemdik jetekshiligimen ótti.

«Búgin naǵyz halyqtyq klassıkalyq mýzyka merekesi boldy. N.Tilendıev árqashan halyqty jaqsy túsinip, jan dúnıesin mýzykamen jetkize bilgen daryndy tulǵa. Onyń ár týyndysy ózindik erekshe mánge ıe», dedi orkestrdiń dırıjery, halyqaralyq baıqaýlardyń laýreaty ıÝrıı Dorohovskıı.

Nurǵısa Atabaıuly Qazaqtyń «Otyrar sazy» akademııalyq folklorly-etnografııalyq halyq mýzykalyq aspaptary orkestrin 1980 jyly Qazaq fılarmonııasy janynan uıymdastyrǵan bolatyn. Orkestrdiń repertýarynda halyq kúıleri, halyq kompozıtorlary jáne osy zamanǵy qazaq sazgerleriniń shyǵarmalary bar.