Almatyda «Nur Otan» partııasy qalalyq fılıaly tóraǵasynyń birinshi orynbasary taǵaıyndaldy
Partııanyń Almaty qalalyq fılıalynyń tóraǵasy, qala ákimi Baqytjan Saǵyntaev bıýro múshelerine «Nur Otan» partııasy qalalyq fılıaly tóraǵasynyń birinshi orynbasaryn tanystyrdy — ol 2019 jyldyń naýryz aıynan bastap Almaty qalasy turǵyn úı saıasaty basqarma basshysynyń orynbasary bolǵan 33 jastaǵy Meıirjan Otynshıev.
Meıirjan Otynshıev — ál-Farabı atyndaǵy Qazaq ulttyq ýnıversıtetiniń, Qaraǵandy ekonomıkalyq ýnıversıtetiniń jáne QR Prezıdenti janyndaǵy memlekettik basqarý akademııasynyń túlegi. Almaty qalasynyń jumyspen qamtý jáne áleýmettik baǵdarlamalar basqarmasynda toǵyz jyl jumys istegen tájirıbeli memlekettik qyzmetker.
Bıýro músheleri usynylǵan kandıdatýrany biraýyzdan qoldap, partııalyq jobalar men bastamalardyń, sondaı-aq partııanyń Almaty qalalyq fılıalynyń saılaýaldy baǵdarlamasynyń iske asyrylýyn, úkimettik emes uıymdarmen jáne qoǵamdyq pikir kóshbasshylarymen syndarly dıalogtyń jalǵasýyn naqty baqylaý qajettigin eske saldy.
Osylaısha Meıirjan Batyrbekuly Otynshıev qalanyń joǵary partııalyq pozıtsııasyna taǵaıyndaldy.
Baqytjan Saǵyntaev partııadaǵy 10 jyldyq jumysy úshin Stanıslav Kankýrovqa alǵysyn bildirdi. Osy ýaqyt ishinde Stanıslav Kankýrov birneshe ret Prezıdenttik jáne Parlamenttik saılaý naýqanyn uıymdastyrý men ótkizýge belsendi qatysty. Bul kezeńde partııanyń qalalyq fılıaly jeke jáne zańdy tulǵalardyń 100 myńnan astam ótinishterin qarady, qala turǵyndarymen tyǵyz qarym-qatynas ornatyldy.
Aıta keteıik, búgingi tańda partııanyń Almaty qalalyq fılıalynda 59 myń partııa múshesi bar, olar 672 bastaýysh partııa uıymyna biriktirilip, megapolıstiń barlyq segiz aýdanynda usynylǵan. Qala boıynsha nurotandyqtardyń basym bóligi Áýezov jáne Bostandyq aýdandarynda turady, júzden astam bastaýysh partııa uıymdary Almaly jáne Áýezov aýdandarynyń kásiporyndarynda qurylǵan.
Foto: facebook.com/NurOtanAGF