Almatyda nóser jaýynnan keıin qala kóshelerin sý basty
Almaty ákimdigi 19:00-gi jaǵdaı boıynsha aqparat taratty, búgin megapolıste 27 mm kóleminde jańbyr jaýǵan.
Bul «Qazgıdromet» málimetine sáıkes, bir aılyq normanyń 80 paıyzyn quraıdy (tamyz aıynda 33 mm).
Nóserletip jaýǵan qysqa merzimdi jańbyrdyń saldarynan qalanyń keıbir aýdandardyń kósheleri men aýlalaryn sý basty.
Jańbyr bastalǵaly beri 52 mobıldi brıgada men 27 motopomba jumyldyryldy.
«Qazirgi ýaqytta sý tasqynyn joıýǵa kúsheıtilgen rejımde 1008 jol qyzmetkeri men 640 arnaıy tehnıka tartyldy. Bul jumystar barlyq qalalyq tótenshe jaǵdaılar qyzmetteri, TJD kúshteri men jóndeý jumystaryna aınalysatyn uıymdardy tarta otyryp júrgizilýde. Medeý aýdanynyń ákimdigi aýdandyq Tótenshe jaǵdaılar departamentimen birlesip, kóshkin qaýpi bar aımaqtarǵa tekserý júrgizdi. Topyraqtyń túsý jaǵdaılary bolǵan joq»,- dep habarlady ákimdikten.
Keshe «Qazgıdromet» RMK 12 tamyz kúni keshke jańbyr jaýatynyn eskertken bolatyn.
Soǵan baılanysty kesheden beri qalanyń kommýnaldyq qyzmetteri sý tasqynynyń aldyn alý jáne kedergisiz sý aǵýyn qamtamasyz etý maqsatynda 320 jumysshy men 89 arnaıy tehnıka tarta otyryp, kanal jelileriniń problemalyq aımaqtaryn, arna ótkelderin jáne qoqystardy jınaýǵa arnalǵan «tuzaqtardy» tazalaý jumystary uıymdastyryldy.
Sonymen qatar, 2 myńnan astam qum salynǵan qap daıyndaldy.
«Aryq jelileri men ótkelder durys jumys istep tur, alaıda joǵary jaqtan qala ortalyǵyna keletin nóser sýynyń anomaldi kólemine baılanysty sý tasqyny jol jıegi men irgeles aýmaqtarǵa aǵyp jatyr. Biraq bul ýaqytsha qubylys. Jaǵdaı jaqyn arada turaqtalady. Barlyq zardaptar jaýyn-shashyn toqtaǵannan keıin birden joıylady»,- dep atap ótti ákimdikten.