Almatyda «Nıkolskıı» bazary jańartylady
Búgin qala basshysy Erbolat Dosaev Almaly aýdanynyń turǵyndarymen kezdesti.
Kezdesýde Almaty qalasy qoǵamdyq keńesiniń múshesi Áset Naýryzbaev Nıkolskıı bazarynyń bolashaǵy týraly sóz qozǵap, usynysyn aıtty.
«Bizdiń aýdanda Almatynyń kórnekti jerine aınalýy tıis eki qalalyq mańyzy bar nysan bar. Ókinishke qaraı, eki oryn da qańyrap bos qaldy. Sonyń biri – Nıkolskıı bazary. Bul jerler saıası jáne qala ákimdiginiń deńgeıindegi másele ekeni belgili. Aýdan ákimine Nıkolskıı bazaryn qaldyrǵany úshin raqmet. Onyń jeke ıesi kim, sony anyqtaý qajet. Meniń usynysym bar: bul nysandy ıesiz dep taný kerek. Óıtkeni ol kóptegen jyldar boıy qańyrap bos tur nemese menshik ıesimen sóılesip, kelissózder júrgizý qajet. Álemde kásipkerler azyq-túlikti turǵyndar úshin qalypty baǵamen satatyn jáne saýda, tamaqtaný oryndarynan aqsha tabatyn bazarlar kóp», - dedi ol.
Almaty qalasynyń ákimi Erbolat Dosaev onyń usynysyn qoldaıtynyn jetkizdi.
«Rasynda da qalada kórnekti oryndar az. Biz Keńes zamanynan qalǵan tarıhı oryndarmen maqtanyp kelemiz, olardy qalpyna keltirýge, jańartýǵa tyrysamyz. Nıkolskıı bazary boıynsha – men úshin saıası másele joq. Búginde oǵan ıelik etetin adamdar bar. Sot isteri júrip jatyr, olardyń qorytyndysy boıynsha sol aktıvpen ne isteý kerektigi, «Barys» bazarymen sııaqty sheshim qabyldanatyn bolady. Birneshe ıdeıamyz bar. Bazardyń tarıhı ótkeni bar, biraq sońǵy 15-20 jyl ishinde onyń ımıdji ózgerdi. Meniń oıymsha, ony qalpyna keltirýdiń qajeti joq, biraq yńǵaıly ári zamanaýı saýda oryndaryn jasaý kerek. Men menshik ıelerine usynys jasadym»,- dedi Erbolat Dosaev.
Áset Naýryzbaev burynǵy tramvaı deposynyń jaıyn da surady.
«Endi depo týraly – bizde Almatynyń kreatıvti keńistigi aıasynda jumys aıaqtalýda. Men jasalatyn nárselerdi kórdim, baıqaýymsha jaqsy bolady. Bul iske bizdiń mamandardy ǵana emes, sheteldik kompanııalar da tartyldy. Jaqynda biz bul jobany jarııalaımyz. Qala jeke ınvestorlarmen bolǵan kelissózden keıin depony ózine alady jáne jaqyn arada bul Almatynyń basty kreatıvti habyna aınalady», – dedi qala basshysy.