Almatyda NEET sanatyndaǵy jastardyń qatysýymen podkast iske qosylady
Jastar saıasaty basqarmasynyń málimetinshe, halyqaralyq jastar kúninde NEET sanatyndaǵy jastarǵa erekshe kóńil bólinetin bolady. Erekshe bastamalardyń biri «BazaraNeet» podkasty iske qosylady. Joba avtorlarynyń aıtýynsha, olar bilimi ne turaqty jumysy joq jastardy áńgimege tartyp, olardyń máselelerin túsinip, ártúrli taqyryptar boıynsha pikirin tyńdaıtyn bolady.
«Ózderińiz biletindeı, podkasttar belgili bir salada jetistikke jetken adamdardyń qatysýymen suhbat arqyly júrgiziledi. Bizdiń podkasttyń maqsaty – eńbek adamdarymen, bazarda jumys isteıtin qarapaıym qala turǵyndarymen baılanys ornatý. Olardyń arasynda kóptegen jastar da bar. Biz olardyń qyzmeti týraly kóbirek bilgimiz keledi, sonymen qatar olardyń maqsatyn, oıyn tyńdaý bizge mańyzdy», - deıdi «Jaidarman» RQB Almaty qalalyq fılıalynyń dırektory Ońdasyn Qulymbetov. Spıkerdiń sózinshe, qoǵamda bolyp jatqan kóptegen oqıǵa týraly aqparat keıde kópshilikke durys jete bermeıdi. «Bizdiń oıymyzsha, jas jigitter men qyzdar bazarda tańerteńnen túnge deıin jumys isteı otyryp, árdaıym qajetti aqparat ala bermeıdi. Osy podkastty túsirip, jastarmen kózbe-kóz kezdese otyryp, biz olarǵa memleket tarapynan jastarǵa arnalǵan túrli múmkindikter men baǵdarlamalar týraly aıtqymyz keledi», - ol.
Aıtýynsha, joba tamyz aıynyń ortasynda bastalady. Podkastty Jaidarman oıynshylary júrgizedi. Spıker atap ótkendeı, olarǵa qarapaıym jumysshylar – satýshy, júk tasýshy jáne kúzetshilerdi áńgimege tartý qıyn bolmaıdy. «Jaıdarman oıyndary áleýmettik lıft ekeni belgili. Jalpy, bizdiń taldaýymyz boıynsha bizdiń negizgi kórermenderimiz – NEET sanatyndaǵy jastar. Jaıdarman oıyndarynda oınaıtyn da, qyzyǵatyn da ózimiz sekildi aýyldyń jastary jáne olardyń sany jyldan-jylǵa artyp jatyr. Biz, Jaıdarman oıynshylary úshin osy jastarmen baılanys ornatý mańyzdy. Osylaısha biz ortada baılanystyrýshy kópir bolǵymyz keledi. Belgili bir jastar tobyn quryp, olarmen keri baılanys ornatqymyz keledi. Osy baǵytta alǵashqy qadamdardy jasap jatyrmyz, nátıjesin jaqyn arada kóresizder», - dedi ol.
Buǵan deıin megapolıste Halyqaralyq jastar kúnin merekeleý aıasynda 18 is-shara ótetini týraly jazǵan bolatynbyz.