Almatyda Naýryz merekesi jalǵasyn tapty
Almatyda 23 naýryz jańbyrly bastalǵanymen tústken keıin kún ashylyp, mereke kórki qyza tústi. Almatynyń«Astana» alańynda tigilgen ınstallıatsııalar «Kerege quraq», «Qos», «Abylaısha» ulttyq muralarymyzdy tarıh qoınaýynan alyp kelgendeı áser qaldyrdy.
Alańda tigilgen, qazirgi ýaqytta túrli tarıhı fılmderde qoldanylyp júrgen «qos» pen «abylaısha» kóshpeli eldiń tarıhı murasy ekenin dáleldep turǵandaı. Almatyǵa kelgen amerıkalyq týrıst Djon Peter kóshpendi dáýiriniń kýási bolǵandaı áser alǵanyn aıtty.
«Bul -tamasha! Qazaq halqynyń mádenıeti tereń. Kóshpendi rýhy áli de bıik ekenin kórdim», - deıdi sheteldik qonaq.
Almatynyń qaıta jóndeýden ótken Panfılov, Jibek joly kósheleri merekede erekshe bezendirilip, halyqtyń demalýyna yńǵaıly bola túsken. Atalǵan kóshelerde álem halyqtarynyń sheberhanalary ornatylyp, ismerler men sheberler qolóner buıymdarynyń qalaı jasalyp, qandaı óńdeýden ótetinin qarapaıym halyqqa túsindirdi. Sheberhanalarda qyshtan ydys-aıaq, turmystyq buıymdar jasalyp, keramıkaǵa oıý salyndy, jibek jipten keste tigilse, halyq sanasynan kóshe bastaǵan orteke men shyrdaq boıynsha sheberlik synyptary ótti. Sonymen qatar, qylqalam sheberleri keskindeme men sýret óneriniń qyr-syryn tanytty. Buǵan deıin habarlanǵandaı, Gınestiń rekordtar kitabyna engeli otyrǵan tiginshilerimiz 25 myń sharshy metrdi quraıtyn quraq kórpeni tigýdi jalǵastyrdy.
Sharalar stýdent jastardyń tanymyn arttyra túskendeı.
«Naýryz merekesinde tek toı toılamaı halqymyzdyń mádenıeti baı ekenin, talaı dúnıelerimiz jańǵyryp jatqanyn bildik. Halqymyzdyń asyl muralary, kıim úlgileri, turmys-tirshiliginde qoldanǵan buıymdary bizdiń sanamyzdy baıyta túsip, jahandaný zamanynda ulttyq bolmysymyzdy saqtap qalýǵa yqpalyn tıgizetindeı», - deıdi Aıda esimdi stýdent.
Sonymen qatar, búgin keshke Qaırat Nurtas tegin án keshin ótkizedi. Osyǵan baılanysty tártip saqshylary Almatyda qaýipsizdik sharalaryn kúsheıtip jatyr.