Almatyda naýqastyń ishinen eki keliden asatyn túzilim alyndy
Naýqastyń aıtýynsha, bir jyldaı buryn ishiniń úlkeıe bastaǵanyn baıqaǵan. Biraq, boıynan eshqandaı yńǵaısyzdyq pen aýyrsyný sezbegen jáne medıtsınalyq tekserýden ótpegen. Keıin ish qýysynda aýysrynýlar paıda bolǵan soń, dárigerlerdiń kómegine júgingen.
Aýrýhananyń málimetinshe, kompıýterlik tomografııa nátıjesinde naýqastyń ishinde úlken túzilimniń bar ekeni anyqtaldy. Qajetti taldaýlar jasalǵan soń, konsılıýmde naýqasqa hırýrgııalyq ota jasaý týraly sheshim qabyldandy. Ota barysynda salmaǵy eki keliden asatyn túzilimdi alyp tastaý úshin aýrýhana hırýrgtaryna eki jarym saǵattan astam ýaqyt ketti.
«Іsh qýysynan tys keńistikte ornalasqan túzilim ish qýysyndaǵy búkil organ, ishektiń bárin oń jaqqa yǵystyryp, ishtiń teń jartysyn alyp jatty. Operatsııanyń kúrdeliligi túzilimniń ish qýysynan tys keńistikte ornalasyp, shap aımaǵyna ótip ketkeninde boldy. Mundaı jaǵdaıda túzilimdi tutas alyp shyǵarý mańyzdy ekenin aıtý kerek. Sondyqtan biz shap aımaǵynan qosymsha tilik jasap, san arterııasynyń janynan sannyń joǵarǵy úshten bir bóligine deıin óttik. Onyń ústine túzilim shekaralary aortaǵa jaqyn jatyp, sol jaq búırektiń shekarasy jáne nesepaǵardyń boıymen ketken. Bul óte qaýipti boldy. Túzilimdi organdardan óte muqııat bólip alý qajet boldy», - dedi QJShKKA ota jasaý bóliminiń meńgerýshisi Nurken Jeldibaev.
«Ota jasaý kezinde ish qýysynan alynǵan túzilim 25-30 sm-ge deıin ósip, salmaǵy 2,240 kg bolǵany anyqtaldy. Operatsııa eki jarym saǵatqa sozylyp, ota jasaý bóliminiń meńgerýshisi N.Jeldibaev, hırýrgtar B. Kasenov pen M. Ahmetov, otalyq medbıke L. Geıdarova jáne anestezıolog B.Bıjanovanyń arqasynda operatsııa sátti ótti. Otadan keıin 7 kún ótken soń naýqas úıine jiberildi», - dep habarlady aýrýhananyń baspasóz qyzmeti.
Osy oraıda dárigerler aǵzadaǵy oryn alǵan kez kelgen ózgeristerdi der kezinde teksertip, dárigerge kórinýdiń mańyzdy ekenin eskertti.