Almatyda naýqastarǵa tegin beriletin dári-dármektiń tizimi keńeıtiledi

ALMATY. QazAqparat - «Ashyq NQA» portalynda Almaty qalasynda tirkelgen Qazaqstan azamattarynyń jekelegen sanattaryna ambýlatorııalyq emdeý kezinde tegin medıtsınalyq kómektiń kepildik berilgen kólemin, onyń ishinde dárilik zattardy, emdik ónimderdi tegin berý týraly sheshimine tolyqtyrýlar engizý jobasy jarııalandy, dep habarlaıdy QazAqparat tilshisi.

Bul qujat «Tegin medıtsınalyq kómektiń kepildik berilgen kólemi sheńberindegi dárilik zattar» bólimine birqatar dárini engizýdi kózdeıdi.

Atap aıtqanda:

- Totsılızýmab – aorta doǵasy sındromyn (Takaıasý) emdeýge;

- Azatsıtıdın – mıelodısplastıkalyq sındromdy emdeýge;

- Everolımýs – týberozdy sklerozdy emdeýge;

- Inflıksımab – kron aýrýyn emdeýge;

- Fınlepsın retard – sananyń buzylýymen jáne eki jaqty tonıkalyq-klonıkalyq ustamalarmen fokaldi ustamalary bar sımptomatıkalyq fokaldi epılepsııany emdeýge;

- Denozýmab – osteoporozǵa;

- Ekýlızýmab – ustamaly gemoglobınýrııaǵa (túngi);

- Levetıratsetam – krıptogendi oshaqty epılepsııaǵa;

- Anakınra – Stılla aýrýyn emdeýge;

- Tsıtrýllına malat, Ýbıdekarenon – MELAS sındromyn emdeýge.

Almaty qalalyq Qoǵamdyq densaýlyq saqtaý departamentinen túsindirgendeı, jergilikti ókildi organdar tegin medıtsınalyq kómektiń kepildik berilgen kólemin qosymsha usyný týraly sheshim qabyldaıdy.

«Qazaqstan Respýblıkasy azamattarynyń jekelegen sanattaryna ambýlatorııalyq emdeý kezinde tegin medıtsınalyq kómektiń kepildik berilgen kólemimen, onyń ishinde dárilik zattardy, arnaıy emdik ónimderdi, medıtsınalyq buıymdardy qosymsha qamtamasyz etýdi kózdeıtin Almaty qalasy máslıhaty sheshiminiń jobasy ázirlendi»,- dep jazylǵan kelisim mátininde.

Qaýly jobasy 22 mamyrǵa deıin qoǵam talqylaýynda bolady