Almatyda nan baǵasyn turaqtandyrýǵa 150 mln teńge bólinedi

ALMATY. QazAqparat - Almatyda áleýmettik nan baǵasyn ustap turý úshin óndirýshilerge sýbsıdııa bólinedi. Bul týraly qalalyq kásipkerlik jáne ınvestıtsııalar basqarmasynyń basshysy Erkebulan Orazalın brıfıng barysynda málim etti, dep habarlaıdy QazAqparat tilshisi.

Spıkerdiń sózinshe, «Azyq-túlik korporatsııasy» UK» AQ qorynan qaladaǵy un tartatyn kásiporyndarǵa sýbsıdııalanǵan astyqty jetkizý jalǵasyp jatyr.

«Áleýmettik nannyń satý baǵasyn bekitý úshin «Almatynan» JShS-ǵa 150 mln teńge bólý josparda. Sonymen qatar jalpy áleýmettik mańyzy bar azyq-túlik taýarlary baǵasynyń ósýin turaqtandyrý maqsatynda «Toımart» jáne «Magným» saýda jelilerimen kelisimder uzartyldy. Small jelisine, sondaı-aq «Koger» JShS-ǵa jumyrtqany arzandatylǵan baǵamen satýǵa qosymsha qarajat baǵyttaldy», - dedi Erkebulan Orazalın.

Aıta keteıik, QR Aýyl sharýashylyǵy mınıstrligi agrarlyq azyq-túlik naryqtary jáne aýyl sharýashylyǵy ónimin qaıta óńdeý departamentiniń dırektory Nazgúl Hatepova elimizde áleýmettik nan baǵasyn 90 teńgeden asyrmaý mindetteletinin aıtqan bolatyn.

Sondaı-aq QR Aýyl sharýashylyǵy birinshi vıtse-mınıstri Aıdarbek Saparov elde astyq tapshylyǵy joq jáne onyń mólsheri jetkilikti ekenin málim etti.