Almatyda N.Nazarbaevtyń qoǵamdyq shtaby óz jumystarynyń qorytyndysyn shyǵardy
Oǵan kandıdat N.Nazarbaevtyń Almaty qalalyq qoǵamdyq shtabynyń jetekshileri men músheleri, «Qazaqstan 2020» Jalpyulttyq demokratııalyq kúshter koalıtsııasynyń músheleri jáne úkimettik emes uıym ókilderi qatysty.
Almatyda saılaý aldy kezinde 1285 úgit-nasıhat jumystary júrgizilgen. Oǵan 600 myńnan asa halyq qatysqan. «Biz ár aýdanda, ár óndiriste halyqtyń aldynda ózimizdiń kandıdatymyz N.Nazarbaevtyń tuǵyrnamasyn halyqqa jetkizý úshin osynsha ıgi sharalar uıymdastyrdyq. Búgin sol jumystarymyzdyń qorytyndysyn shyǵaryp otyrmyz»,-dedi professor Rahman Alshanov.
«Bárińizge belgili, kóptegen partııa jáne qoǵamdyq uıymdar «Qazaqstan 2020» Jalpyulttyq demokratııalyq kúshter koalıtsııasynyna múshe bolyp kirdi. Alda sheshýshi sát kele jatyr. Ol - saılaý. Sol sebepti, barlyq kúshti osy baǵytqa jumyldyrý kerek. Úgit-nasıhat kezinde qala turǵyndarynyń kóbi Elbasyn qoldaıtyndaryn bildirdi. Ásirese, N.Nazarbaevtyń ustanyp otyrǵan saıasatyn eńbek ujymdary jaqsy qoldap otyr. Aldaǵy saılaýda bizdiń kandıdat kóp daýysqa ıe bolady degen senimdemiz»,-dedi R.Alshanov.
«Qazir Qazaqstannyń ekonomıkasy qarqyndy damyp keledi. Biz 126 elge 200 túrli taýar shyǵaramyz. Bul kórsetkish Eýropanyń keıbir elderinen artyq bolmasa, kem emes. Al endi jalpy ishki ónim keıingi 10 jyldyń ishinde 7 esege, eńbekaqy 5 esege, zeınetaqy 4 esege kóbeıgen. Bilimge bólinetin qarjy 10 esege ósti. Ǵylymǵa bólinetin qarjy 3,5 esege kóbeıdi. Munyń bári eldiń ekonomıkasynyń órkendegenin kórsetedi. Kóptegen turyp qalǵan zavod-fabrıkalarymyz qaıtadan iske qosylyp jatyr. Sondaı-aq, 2010 jyly 1 jyldyń ishinde 154 mekeme iske qosyldy. Onda 200 myń jumysshy jumys taýyp, qazir qosymsha jumys istep jatyr. Jalpy qazaqstandyqtardyń baqytty ómir keshýi úshin Elbasy kóptegen jumystar atqaryp otyr. Atqarady da. Sol sebepti, 3 sáýir kúni almatylyqtar ózderiniń saılaý ýchaskelerine kelip óz úmitkerlerin tańdaıdy degen senimdemiz»,- dedi QR Ulttyq ǵylym akademııasynyń prezıdenti Murat Jurynov.