Almatyda myńǵa jýyq adam koronavırýstan emdelip jatyr

ALMATY. QazAqparat – Almatyda bir táýlikte 580 adam koronavırýs juqtyrdy. Onyń 534-i sımptomdyq belgilermen jáne 46-sy sımptomsyz. Bul týraly qalalyq qoǵamdyq densaýlyq saqtaý basqarmasynan málim etti, dep habarlaıdy QazAqparat tilshisi.

Jazylyp shyqqandar sany 160 bolsa, 72 adam aýrýhanaǵa jańadan tústi.

3 310 tósek-orny bar ınfektsııalyq statsıonarlarda 932 adam, onyń ishinde 50 bala emdelip jatyr. Jalpy reanımatsııa jáne qarqyndy terapııa bólimshesinde – 78 adam jatyr.

20 naýqas jasandy tynys alý apparatyna qosylǵan. Invazıvti emes jasandy tynys alý apparatynda 24 adam em qabyldaýdy jalǵastyrýda. High flow-da 18 apparat jumys isteıdi.

Medıtsınalyq-sanıtarııalyq alǵashqy kómek mobıldi brıgadalarynyń jáne Telemedıtsına ortalyǵynyń ambýlatorııalyq baqylaýynda 3 668 patsıent bar. Onyń ishinde jeńil jáne ortasha aýyr jaǵdaıda – 3 431 naýqas. Sımptomsyz 237 naýqas bar.