Almatyda múmkindigi shekteýli adamdardy jumysqa ornalastyrý ortalyǵy ashyldy

ALMATY. QazAqparat - Almatyda TenQogam múgedekterdi jumyspen qamtý ortalyǵy óz jumysyn bastady, dep habarlaıdy QazAqparat tilshisi.

«Shyraq» múgedektigi bar áıelder qaýymdastyǵynyń tóraıymy Lázzat Qaltaevanyń aıtýynsha, joba múmkindigi shekteýli jandarǵa biliktiligin arttyrýǵa jáne jetildirýge kómektesetin platforma retinde oılastyrylǵan.

«Múgedekterdi jumyspen qamtý boıynsha «Shyraq» múgedektigi bar áıelder qaýymdastyǵynyń tájirıbesi mol. Biz múmkindigi shekteýli jandardyń tolyqqandy jumys istegenin qalaımyz. Jasyratyny joq, múgedekter jumysqa ornalasqanymen ol jerde uzaq ýaqyt isteı almaıdy. Óıtkeni, eńbek sharty eń kóp degende bir jarym-eki aıǵa sozylady «, - dedi Lázzat Qaltaeva.

TenQogam komandasynyń negizgi mindetteri – múmkindigi shekteýli adamdarǵa jumys tabýǵa jáne ornalasýǵa kómektesý, jumysqa qajetti bilim men daǵdylardy berý.

«Ortalyqta jetekshi psıhologtar, jumysqa ornalasýǵa kómektesetin mamandar, múgedekterge zań jaǵynan keńes beretin zańgerler jumys isteıdi»,– deıdi ol.