Almatyda muqtaj otbasylardyń balalaryn mektepke daıyndaýǵa 847 mln teńge bólindi

ALMATY. QazAqparat – Almaty ákimdigi muqtaj otbasylardyń balalaryn mektepke daıyndaýǵa 847 mln teńge bóldi. Bul týraly onlaın brıfıng barysynda Almaty qalalyq Bilim basqarmasy basshysynyń orynbasary Aıdyn Saılaýbaı málim etti, dep habarlaıdy QazAqparat tilshisi.

«Bıyl ár oqýshyǵa mektep formasy men keńse taýarlaryn alýǵa 43 000 teńge bólindi, onyń 35 000 teńgesi mektep formasyna, 8 000 teńgesi mektepke qajetti qural-jabdyqtarǵa bólindi. Kómekpen 19 701 bala qamtyldy, bul maqsatqa jergilikti bıýdjetten 847 mıllıon teńge bólindi. Tólemder ata-analardyń esep kartalaryna 100% qarajat aýdarý arqyly júzege asyryldy»,- dedi spıker.

Budan bólek, «Mektepke jol» aktsııa aıasynda demeýshiler áleýmettik osal toptaǵy 5,6 myńnan astam balaǵa mektep formasy men qalam, dápter salynǵan rıýkzaktar syıǵa tartty.

Sóz sońynda spıker Almaty qalasynda qoıý kók tústi mektep formasy belgilengenin eske saldy.