Almatyda múgedektigi bar áıelder birigip, tıimdi jumys isteýdi úırenýde
dep habarlaıdy QazAqparat.
Atalmysh shara «Shyraq» múgedek áıelder qaýymdastyǵy men Halyqaralyq ÚEU-dy oqytý jáne zertteý ortalyǵynyń uıymdastyrýymen ótýde. Trenıngterdi múgedektik pen genderlik suraqtardy jetik biletin kásibı qazaqstandyq jattyqtyrýshylar men Halyqaralyq ÚEU-dy oqytý jáne zertteý ortalyǵynyń jattyqtyrýshylary ótkizýde. Trenıngke qatysýshylar qabiletterin jetildirýmen qatar, tájirıbelik bilim men ádistemelerimen de almaspaq.
"Sharanyń mindetinde basqarýdaǵy jeke qarym-qabiletterin damytý ǵana emes, jelilik birlestik qurý, memlekettik organdarmen qarym-qatynas jasaý, múgedektik salasyndaǵy áleýmettik baǵdarlamalardy jetildirý jaǵyn da uıymdastyrýǵa yqpal etý kiredi. Trenıng eń aldymen kelissóz júrgizýdi úırenýge, jumysyndaǵy basymdylyqtardy anyqtaýǵa, fandreızıngti uıymdastyra bilýge, strategılyq oılaý qabiletin damytýǵa, sondaı-aq jalpy jumysty uıymdastyra bilýge baǵyttalǵan", dedi «Shyraq» múgedek áıelder qaýymdastyǵynyń tóraıymy Lázzat Qaltaeva.
Onyń aıtýynsha, trenıngtik kýrs kóshbasshylyq qabiletin nyǵaıtýǵa arnalǵan ekijyldyq jobanyń bir bóligi. "Bul joba Eýropalyq Odaqtyń qoldaýymen iske asýda. Jobaǵa sonymen qatar, Qazaqstandaǵy Ulybrıtanııa Elshiligi, Frıdrıh Ebert atyndaǵy qor men Soros Qazaqstan qory qoldaý bildirip otyr. Eýropalyq Odaq jobany iske asyrýǵa 150 myń eýro qarajat bóldi", dedi ol.
Onyń aıtýynsha, qazirgi ýaqytta múgedektigi bar áıelder uıymdarynyń jelilik júıesi qurylǵan. "Oǵan Ońtústik Qazaqstan, Batys Qazaqstan jáne Soltústik Qazaqstan oblystarynyń 14-ten asa úkimettik emes uıymdary kirdi. Buǵan deıin ótken trenıngter nátıjesinde qatysýshylar áleýmettik mańyzy bar suraqtar boıynsha kishigirim jobalardy ózderi iske asyrýda. Sondaqtan, mundaı trenıngter jemisti nátıjelerge qol jetkizýge múmkindik berýde dep aıtýǵa bolady", dep atap ótti Lázzat Qaltaeva.
Almaty qalasynda bastalǵan trenıng tamyzdyń 16-18 aralyǵynda Atyraý men Astana qalasynda jalǵasady.