Almatyda muǵalimder Jańa jyldyq keshten bas tartty

ALMATY. QazAqparat - Almatyda muǵalimder Jańa jyldyq otyrystan bas tartyp, muqtaj otbasylarǵa kómektesýge bel sheshti, dep habarlaıdy QazAqparat tilshisi.

Jetisý aýdanynyń 21 mektep dırektory men 22 balabaqsha meńgerýshisi jańajyldyq keshten bas tartty. Muǵalimder bul qarajatty qaıyrymdylyq maqsatta jumsamaq.

Muqtaj otbasylarǵa azyq-túlik pen kıim-keshek taratý josparda bar.

«Bul bastamany kótergen aýdan ákimdiginiń basshysy bolatyn. Jetisý aýdanynda muqtaj otbasylar óte kóp. Bul joly múmkindigi shekteýli balalardyń otbasyna kómek berýge basa nazar aýdarylyp otyr. Balalarǵa qysqy syrt kıim, jyly aıaq kıim, azyq-túlik kárzeńkesi beriledi. Sonymen qatar, #137 mektep oqýshysynyń omyrtqasyna ota jasaý úshin qarajat beriledi», - dedi Jetisý aýdany bilim bóliminiń basshysy Saltanat Qusaıynova.

Onyń aıtýynsha, bolashaqta muǵalimder bul bastamany qaıyrymdylyq estafetasyna aınaldyrmaq.

Aıta keteıik, buǵan deıin Jetisý aýdanynyń 2019 jylǵy túlekteri arnaıy kesh jasaýdan bas tartyp, jınalǵan qarajatty qaıyrymdylyq sharalaryna jumsaǵan bolatyn.

foto: kaznews.kz/news