Almatyda moped mingen jasóspirim jol apatyna túsip, 10 kún komada jatty

ALMATY. QazAqparat – Almatylyq dárigerler jol apatynan aýyr jaraqat alǵan jasóspirimdi ajaldan arashalap qaldy, dep habarlaıdy QazAqparat tilshisi.

Emdeý mekemeleriniń málimetinshe, jol-kólik oqıǵasynan kámeletke tolmaǵan moped júrgizýshisi aýyr jaraqat alǵan. Jedel járdem brıgadasy jasóspirimdi oqıǵa ornynan №4 qalalyq klınıkalyq aýrýhananyń qabyldaý bólimine jetkizgen. Naýqas dereý jansaqtaý bólimine jatqyzyldy. Oǵan shokqa qarsy terapııa júrgizildi, №2 balalar klınıkalyq aýrýhanasynyń pedıatr jáne tar beıindi mamandary shaqyrylyp, konsılıým ótkizildi.

Naýqasqa jabyq bas súıek-mı jaraqaty, mıdyń aýyr jaraqaty, tómengi jaq súıeginiń synýy, jabyq keýde jaraqaty, sol jaq ókpeniń soǵylýy, oń jaq 1-qabyrǵanyń synýy, sol jaq buǵana súıeginiń jabyq synýy, eki jambas súıeginiń ortańǵy úshten bir bóliginiń synyqtarynyń yǵysýymen jabyq syný dıagnozy qoıyldy.

№4 qalalyq klınıkalyq aýrýhananyń anestezıologııa, reanımatsııa jáne qarqyndy terapııa bóliminiń dárigerleri jasóspirimniń ómiri úshin 10 kún kúresti. Onyń jaǵdaıy turaqtalǵannan keıin ákimshiliktiń kelisimimen naýqas №2 balalar klınıkalyq aýrýhanasyna aýystyryldy. Munda ony balalar neırohırýrgteri, ortoped-travmatologtar, nevropatologter, kardı-revmatologter, oftalmologter tekserdi. Emdik sharalar kesheni júrgizildi. Intramedýllıarlyq osteosıntezdi tejeý arqyly ishki bekitýmen jambas súıekteriniń fragmentteriniń ashyq repozıtsııasy otasy sátti oryndaldy.

10 kún komada jatqan jasóspirimniń ákesi mopedpen kele jatqan ulyn Chevrolet kóligi qaǵyp ketkenin aıtady.

«Balamdy ajaldan arashalap qalǵan №4 qalalyq aýrýhana ujymyna jáne №2 balalar aýrýhanasynyń medıtsına qyzmetkerlerine rahmet. Ulym zeńbilmen jetkizilgen edi, úıge óz aıaǵymen shyqty», - deıdi ol.

Naýqas jaraqattan keıingi ońaltýdyń eki kýrsyn statsıonarda aıaqtap, turǵylyqty jerindegi emhanada ambýlatorlyq ońaltýdyń úshinshi kýrsyn ótip jatyr.