Almatyda mı ınsýltin dıagnostıkalaıtyn jasandy ıntellekt júıesi tanystyryldy
Qazaqstan Respýblıkasynyń Tsıfrlyq damý, ınnovatsııalar jáne aeroǵarysh ónerkásibi mınıstri Baǵdat Mýsın jumys saparymen Almaty qalasyna keldi.
Vedomstvo basshysy qalany tsıfrlandyrý barysymen tanysyp, birqatar nysandardy aralady.
Sapar barysynda mınıstr Baǵdat Mýsın Almaty qalasynyń ákimi Baqytjan Saǵyntaevpen kezdesip, megapolısti tsıfrlandyrý salasyndaǵy aǵymdaǵy jaǵdaıdy jáne aldaǵy jylǵa josparlardy talqylady.
Sondaı-aq, Baǵdat Mýsın men Baqytjan Saǵyntaev ákimdiktiń tapsyrysy boıynsha «Zerde» holdıngi ázirlegen Almaty qalasynyń IT-arhıtektýrasyna qol qoıdy.
Bul ońtaıly baǵyttardy odan ári damytý jáne «SmartCity» platformasyn iske asyrý joldaryn aıqyndaýǵa jáne basym jobalardyń tizbesin qalyptastyrýǵa múmkindik beredi.
Mınıstr Qazaq onkologııa jáne radıologııa ǵylymı-zertteý ınstıtýtynda bolyp, oǵan «Crystal Spring» júıesin tanystyrdy.
Júıe jasandy ıntellekt (JI) arqyly rentgen sýretteri negizinde ókpeniń onkologııalyq aýrýlaryn dıagnostıkalaýǵa múmkindik beredi.
Búgingi tańda JI ókpe aýrýlarynyń 14 túrli belgilerin, onyń ishinde pnevmonııany Covid-19 kórinisteriniń biri retinde anyqtaı alady.
Ónim 2020 jylǵy naýryzda birneshe klınıkalarda synaq rejıminde iske qosyldy. Qazirgi ýaqytta dárigerler ony kúndelikti qoldanady.
Baǵdat Mýsın Almaty qalasyndaǵy eń iri kópsalaly klınıka – №7 Qalalyq klınıkalyq aýrýhananyń jumysymen tanysty. Mınıstrge «Almaty jasandy ıntellekt zerthanasy» ázirlegen CEREBRA jobasy tanystyryldy.
CEREBRA dárigerlerge ınsýltty erte satysynda anyqtaýǵa kómektesedi.
Tolyq saraptamalyq esepti kompıýterdegi veb-platformadan jáne iOS jáne Android-taǵy mobıldi qosymshalardan alýǵa bolady.
Medıtsınalyq mamandar atap ótkendeı, ınsýlt kezinde mıǵa qan aǵynyn qalpyna keltirý barlyq fýnktsııalardyń tolyq qaıtarylýymen 4,5 saǵat ishinde múmkin bolady.
CEREBRA jobasyna engizilgen JI ınsýltty 10 mınýt ishinde tanýǵa jáne ınsýlt ıadrosyndaǵy tinderdiń tyǵyzdyǵynyń ózgerýin esepteýge kómektesedi.
«Almaty jasandy ıntellekt zerthanasy» Astana Hub IT-startaptar halyqaralyq tehnoparkiniń qatysýshysy bolyp tabylatynyn atap ótý qajet.
Baǵdat Mýsın osyndaı jobalardyń mańyzdylyǵyn jáne Qazaqstanda, ásirese medıtsına salasynda JI damytý qajettiligin atap ótti.
Sondaı-aq, mınıstr jasandy ıntellekt «Tsıfrlyq Qazaqstan» baǵdarlamasynyń basym klasterleriniń biri bolyp tabylatynyn jáne mınıstrlik startaptarmen, zertteý uıymdarymen jáne bıznespen birlesip jumys júrgizip jatqanyn, onyń arqasynda osyndaı sheshimder iske asyrylyp jatqanyn atap ótti.
Budan basqa, vedomstvo basshysy Qazaqstan-Brıtan tehnıkalyq ýnıversıtetine, «Innovatsııalyq tehnologııalar parki» derbes klasterlik qoryna baryp, Almatynyń IT-qaýymdastyǵymen kezdesý ótkizdi.