Almatyda memlekettik qyzmet túrleriniń jármeńkesi ótti
Almaty qalasy ákimi apparatynyń «OpenAlmaty» qoǵamdyq qabyldaý alańynda memlekettik qyzmet jármeńkesi ótti. Atalǵan sharany Memlekettik qyzmet isteri jáne sybaılas jemqorlyqqa qarsy is-qımyl agenttiginiń Almaty qalasy boıynsha departamenti men Almaty qalasy ákiminiń apparaty uıymdastyrdy.
Jármeńkege sáýlet jáne qala qurylysy, densaýlyq saqtaý, bilim, azamattyq hal aktilerin tirkeý, jer qatynastary jáne basqa da baǵyttar boıynsha memlekettik qyzmet kórsetetin 23 memlekettik organ qatysty. Búgin jármeńkege 922 adam keldi, olardyń 727-i tıisti keńes alsa, 195 adamǵa tikeleı qyzmet kórsetildi.
Jármeńkeniń basty maqsaty - halyqqa kórsetiletin memlekettik qyzmetterdi usyný tártibin jáne «Azamattarǵa arnalǵan úkimet» memlekettik korporatsııasynyń «elektrondy úkimet» portaly arqyly kórsetiletin qyzmetter týraly keńinen túsindirý.
Jalpy, Almaty qalasynda 478 memlekettik organ memlekettik qyzmetterdi kórsetedi, usynylatyn qyzmetterdiń jalpy sany 353.
Búgingi kúni memlekettik korporatsııa jáne «elektrondy úkimet» portaly arqyly memlekettik qyzmetterdiń 60%-y kórsetiledi.
Elektrondy tsıfrly kilti alǵysy keletinderdiń barlyǵyna 15 mınýt ishinde qyzmet kórsetildi, olar bul múmkindikke úılerinen shyqpaı-aq qol jetkize alady ári ýaqyttaryn únemdeıdi.
Jármeńkege kelýshilerdiń basym kópshiligi salyq tólemderin júrgizýdiń tártibi men sharty, advokattyq jáne natorıaldyq qyzmet boıynsha lıtsenzııalar alý, jer telimderi, jyljymaıtyn múlikterdi resimdeý týraly suraqtar qoıdy.
Kópshilik tarapynan elektrondy tsıfrly qoltańba, mekenjaıy jáne sottalmaǵandyǵy týraly anyqtama alý, jyljymaıtyn múlikti tirkeý quqyqtary, medıtsına uıymdaryna tirkelý jáne elektrondy qyzmetterdiń ózge de túrleri boıynsha saýaldar kóp tústi.
40 adamnan medıtsınalyq uıymdarǵa tirkeý boıynsha ótinim berilip, olarǵa elektrondy tsıfrly qoltańba alǵan soń qyzmet kórsetildi.
Mundaı memlekettik qyzmet jármeńkesi qalanyń barlyq aýdanynda jalǵasatyn bolady. Jaqyn arady Túrksib jáne Naýryzbaı aýdandarynda jármeńke ótkizý josparlanǵan.
Aıta keteıik, «Almaty - 2020» damytý baǵdarlamasynda Sapaly áleýmettik qyzmetter, onyń ishinde halyqtyń osal toptary úshin sapaly áleýmettik qyzmetter kórsetý máselesi qamtylǵan.
«Qalamyzdy ári qaraı damytý maqsattaryna qol jetkizý jańa áleýmettik saıasattyń sapasy men tıimdiligine baılanysty.
Jumsyssyzdyq deńgeıin 5%-ǵa deıin qysqartý eńbek naryǵyn damytý men qala halqyn áleýmettik qorǵaýdyń negizgi baǵyttaryna aınalady. «Jumyspen qamtý 2020 jol kartasy» baǵdarlamasynyń sheńberinde qoǵamdyq jumystar men áleýmettik jumys oryndary arqyly jumyspen qamtamasyz etý boıynsha sharalar qabyldanady. Jumyspen qamtylý deńgeıin arttyrý úshin kúsh-jiger jumyssyzdardy eńbek naryǵynda barynsha suranysqa ıe kásipter boıynsha qaıta daıarlaý jáne biliktiligin arttyrýǵa baǵyttalatyn bolady. Turmysy tómen adamdarǵa áleýmettik qoldaý kórsetý ataýly áleýmettik kómekke jáne turaqty jáne nátıjeli jumyspen qamtý jolymen halyqtyń tabysy deńgeıin arttyrýǵa negizdeledi. Aldaǵy 5 jylda memlekettik áleýmettik járdemaqylardyń mólsheri júıeli túrde kóterilip, al ataýly áleýmettik kómek eń tómengi kún kóris deńgeıiniń 60%-ǵa deıin jetkiziledi. Bul rette memleketten beriletin kómekke muqtaj adamdardy tek járdemaqy alýshylar rólimen ǵana shekteýge bolmaıdy. Kómek sandyq mólsherde ǵana emes, sonymen birge qalanyń kómekke muqtaj turǵyndarynyń barynsha ózin-ózi tanytýy (samorealızatsııa) jáne áleýmettenýi úshin jaǵdaılar jasaýdan kórinýi tıis. Arnaýly áleýmettik qyzmetterge muqtaj adamdardy 100%-dyq qamtý bıynsha sharalar qabyldanady.
Múmkindigi shekteýli adamdar úshin kedergisiz qalalyq ortany qurý máselelerine erekshe kóńil bólinedi. Osyǵan baılanysty múgedektigi bar adamdar úshin áleýmettik jáne basqa da ınfraqurylymdy beıimdeý jumystary jalǵasyn tabady. Jergilikti ókildi organdardyń sheshimi boıynsha áleýmettik qyzmet azamattardyń jekelegen sanattaryna kórsetiletin bolady (turmysy tómen azamattarǵa bir jolǵy materıaldyq kómek kórsetý, UOS qatysýshylar men múgedekterine Jeńis Kúniniń qarsańynda materıaldyq kómek kórsetý, UOS qatysýshylaryna teńestirilgen adamdarǵa, UOS jyldary, Aýǵanstanda jáne Chernobyl AES apaty kezinde qaıtys bolǵan adamdardyń jesirleri men otbasylaryna bir jolǵy materıaldyq kómek kórsetý jáne t.b.), - dep kórsetilgen.
Foto: liter.kz