Almatyda memlekettik kirister departamentiniń tergeýshisi para alǵany úshin sottaldy

ASTANA. QazAqparat - Qazaqstan Respýblıkasynyń Ulttyq qaýipsizdik komıteti Almaty qalalyq memlekettik kirister departamentiniń laýazymdy qyzmetkerleriniń rezonansty qylmystyq ister boıynsha iri mólsherde qorqytyp para alý faktilerin anyqtap, jolyn kesti. Bul týraly vedomstvoǵa silteme jasap QazAqparat habarlaıdy.

2018 jyly kommertsııalyq qurylymdardyń biriniń basshysy QR azamaty «A»-dan 15 myń AQSh dollary mólsherinde para alý kezinde ustalǵan Almaty qalalyq MKD qyzmetkerleri I. Nurǵasymov pen K. Qojabekov sottaldy.

2018 jyldyń sońynda Almaty qalalyq MKD taǵy bir ofıtseri óz áriptesterine qatysty shyǵarylǵan úkimge qaramastan, jábirlenýshi «A»-dan taǵy da para talap etti. Sonymen, Almaty qalalyq memlekettik kirister departamentiniń asa mańyzdy ister boıynsha aǵa tergeýshisi B. Esembaev qylmystyq jaýaptylyqqa tartýmen qorqytyp, birneshe márte kezdesýde «A»-dan 13,5 myń AQSh dollaryn qorqytyp almaq bolǵan.

B. Esembaev zańsyz aqshalaı syıaqy alý kezinde ustaldy jáne onyń kinási tergeý barysynda tolyqtaı dáleldendi.

Kinásin moıyndaǵanyn jáne jasaǵanyna ókinetinin eskere otyryp, para alýshy B.Esembaevty Almaly aýdanynyń soty 2 jyl 7 aıǵa bas bostandyǵynan aıyrdy.