Almatyda mektepti keńeıtý úshin dámhana aýmaǵy satyp alynady

ALMATY. QazAqparat – Almatyda turǵyndardyń ótinishi boıynsha Medeý aýdanynda ornalasqan №29 mektepti keńeıtý úshin onyń janyndaǵy káýaphana aýmaǵy satyp alynbaq, dep habarlaıdy QazAqparat tilshisi.

Qala ákimimen kezdesýde Medeý aýdany turǵyndarynyń biri Bógenbaı batyr kóshesinde ornalasqan káýaphanaǵa shaǵymdandy.

«Qasteev pen Begalın arasyndaǵy káýaphana biz úshin problemaǵa aınaldy. Naqty aıtar bolsam, tútin, shý, aıqaı, únemi urys-keris, kólikter, sonyń saldarynan úıge kire almaımyz. Tipti, úıge kirý úshin polıtsııa shaqyramyz», - dedi ol.

Medeý aýdanynyń ákimi Erkebulan Orazalın máseleniń qalaı sheshiletinin aıtty.

«Ol mekenjaıǵa birneshe ret bardyq. Siz shaǵymdanǵan birinshi «Chachapýrı» boıynsha, sol mańda №29 mektep ornalasqan. Bilim mekemesin keńeıtý úshin bul aýmaqty satyp alýdy josparlap otyrmyz. Joldyń arǵy jaǵynda ekinshi «Chachapýrı» ashyldy. Biraq, onyń barlyq qujaty zańdy. Jalǵyz nárse, kafeniń artynda ornalasqan mangal kórshilerge jaqyn tur. Oǵan súzgilerdi qoıamyz. Shýǵa qatysty másele únemi bizdiń baqylaýymyzda», - dep túsindirdi aýdan ákimi.

Erbolat Dosaev №29 mekteptiń aýmaǵyn keńeıtý sharalary kóp uzamaı júzege asatynyn jetkizdi.

«Az qaldy, aıaqtaımyz. Jer ýchaskesin naryqtyq baǵamen satyp alýymyz kerek. Mektepti keńeıtemiz, 2-3 aıda másele sheshiledi», - dedi Almaty ákimi.