Almatyda mektep janyndaǵy lagerge baratyn 30 myńnan astam oqýshy tegin tamaqtanady

ALMATY. QazAqparat- Mektep janyndaǵy lagerge baratyn 30 myńnan astam oqýshy tegin tamaqpen qamtamasyz etiledi. Ol úshin jergilikti bıýdjetten 250 mln tenge bólindi. Bul týraly Erbolat Dosaev Túrksib aýdany turǵyndarymen kezdesýi barysynda aıtty, dep habarlaıdy QazAqparat tilshisi.

«Qazir mektepterde jazǵy lagerler ashyldy. Ýaqytyly tamaqtaný balalar úshin óte mańyzdy, biraq bul kóptegen ata-analar úshin qymbat. Sheshim bar ma?»,- dep surady qala basshysymen kezdesýge kelgen Túrksib aýdanynyń turǵyny.

Erbolat Dosaev mektep janyndaǵy lagerlerge baratyn bastaýysh synyp oqýshylary tegin tamaqtanatynyn jetkizdi.

«Bıyl biz mundaı máselege erekshe nazar aýdardyq. 1-den 4-synypqa deıingi balalar úshin 10 kúndik mektep janyndaǵy lagerlerge 250 mln teńge bólýge kelisim berdim. 30 myńnan astam balany tegin tamaqpen qamtamasyz etemiz. Bári jaqsy bolady»,- dedi ol.

Aıta ketpeıik, balalar mektep janyndaǵy lagerlerge saǵat 9:00-den 15:00-ge deıin 10 kún barady. Áleýmettik jaǵdaıyna qaramastan ystyq tamaq barlyǵyna tegin beriledi.

Sondaı-aq, az qamtylǵan jáne kópbalaly otbasylardan shyqqan 3500-den astam oqýshy, ata-anasynyń qamqorlyǵynsyz qalǵan balalar men jetimder jergilikti bıýdjet esebinen jazǵy qala syrtyndaǵy demalyspen qamtylatyn bolady.