Almatyda mektep muǵalimi teńiz shoshqasyn azaptap óltirse, oqýshylary onyń denesin bólshektep tastady
Áleýmettik jelide Almaty mektepteriniń birinde mektep muǵalimi teńiz shoshqasyn azaptap óltirgen soń, ary qaraı oqýshylar janýardyń denesin kesip, bólshektep jatqany týraly vıdeo shyqty.
Osyǵan baılanysty janýarlardy qorǵaýshylar polıtsııadan atalmysh jaǵdaı qaı mektepte bolǵanyn anyqtap, mektep dırektory men muǵalimin jazalaýdy surady.
«Mektepterde janýarlarǵa mundaı zertteýler júrgizýdi durys emes ári ol balalardyń boıynda qatygezdik sezimin damytady», - dep jazdy zooqorǵaýshylar
Atalmysh oqıǵaǵa qatysty Almaty qalalyq bilim basqarmasy resmı jaýap berdi. Oqıǵa qaladaǵy jekemenshik mektep - «125 Almaty» JShS-da bolǵan.
Vedomstvo málimetinshe, 20 aqpan kúni Ákimshilik rásimdik-protsestik kodekstiń 72-babyna sáıkes Bilim berý salasyndaǵy sapany qamtamasyz etý departamenti men qalalyq bilim basqarmasynyń qyzmetkerleri áleýmettik jelide ornalastyrylǵan beınematerıal boıynsha mán-jaıdy anyqtaý úshin Almaty qalasynyń «125 Almaty» JShS jekemenshik mektebine bardy.
Oqıǵany anyqtaý barysynda atalmysh jaǵdaı 17 aqpanda Almaty qalasynyń jekemenshik mektebiniń 10-synybynda bıologııa pániniń qosymsha tájirıbelik sabaǵynda bolǵan.
Muǵalimniń sózinshe, oqýshylardyń ótinishimen anatomııa jáne fızıologııa bólimin jalpylaý boıynsha tájirıbelik sabaq ótkizgen.
«Jekemenshik mektep pedagogtarymen budan bylaı mundaı oqıǵalarǵa jol bermeý boıynsha túsindirý jumystary júrgizildi. Sondaı-aq, mektep ákimshiligine mektepishilik baqylaýdy kúsheıtý, tárbıe jumysy boıynsha qorshaǵan ortaǵa uqypty qaraýdy qalyptastyrý jáne janýarlarǵa qatygezdiktiń aldyn alý boıynsha usynystar berildi. Bıologııa pániniń muǵalimi óz erkimen jumystan shyqty», - dep habarlady Almaty qalalyq bilim basqarmasynda.
Foto: domashnilubimci.eu