Almatyda medıtsınalyq uıymdarǵa 265 mln teńge aıyppul salyndy

ALMATY. QazAqparat – Osy jyldyń birinshi toqsanynda Almaty turǵyndaryna kórsetilgen medıtsınalyq kómek sapasyn baqylaý barysynda 58 myń qyzmettiń túrli kemshiliktermen kórsetilgeni anyqtaldy. Nátıjesinde qaladaǵy emdeý mekemelerine 265 mln teńge aıyppul salyndy. Bul týraly «Áleýmettik medıtsınalyq saqtandyrý qory» KEAQ Almaty fılıaly dırektorynyń orynbasary Janar Kenjebaeva málim etti, dep habarlaıdy QazAqparat tilshisi.

Aıtýynsha, kemshiliktiń basym bóligine bastapqy medıtsınalyq-sanıtarlyq kómek uıymdary jol bergen. Olar 57 myńnan astam qyzmetti kemshiliktermen kórsetkeni úshin 150 mln teńge kóleminde aıyppul arqalady.
Sonymen qatar, aqaýmen kórsetilgen 680 qyzmet – statsıonarlar men statsıonardy almastyratyn kómek uıymdaryna tıesili. Olar atalǵan kemshilikter úshin 100 mln teńge aıyppul tóledi.
«Monıtorıng barysynda anyqtalǵan kemshilikterdiń deni emdeý-dıagnostıka barysynda belgilengen standarttardan aýytqý, medıtsınalyq qujattardy durys toltyrmaý, qyzmet baǵasyn negizsiz ósirý syndy olqylyqtarǵa kelip saıady. Sonymen qatar, «kórsetildi» dep jazylǵan belgili bir qyzmet túrleriniń shyn máninde kórsetilgenin rastaı almaǵan klınıkalar da bar», – dedi Janar Kenjebaeva.
Esterińizge sala ketsek, Qor sarapshylary halyqqa kórsetilgen qyzmet sapasyn turaqty baqylap otyrady.
«Búginde dáriger kómegine júginbegen adamdy «qabyldaýda boldy» dep jazý máselesi jurtshylyq arasynda ózekti máselege aınalǵany belgili. Bıylǵy qańtar-naýryz aılary aralyǵynda fılıal mamandary azamattardan túsken aryz-shaǵymdar nátıjesinde osyndaı 50 faktini anyqtap, emhana-ambýlatorııa deńgeıinde júrgizilgen monıtorıng barysynda medıtsına uıymdaryna 1,5 mln teńge aıyppul saldy. Qaıtaryp alynǵan qarajat medıtsınalyq kómektiń ózge túrlerine jumsalady»,- dedi fılıal basshysynyń orynbasary.
Aıta keteıik, ońtústik astanada 226 medıtsına uıymy tegin medıtsınalyq kómek jáne MÁMS paketteri sheńberinde qyzmet kórsetedi.