Almatyda «maýglı» balalardyń anasy ata-ana quqyǵynan aıyrylady

ALMATY. QazAqparat – Almatyda 3, 6 jáne 7 jasar bala maskúnem anasymen antısanıtarııa jaǵdaıynda ómir súrip kelgen. Endi «maýglı» balalardyń anasy ata-ana quqyǵynan aıyrylmaq, dep habarlaıdy QazAqparat Polisia.kz-ke silteme jasap.

Dabyldy Medeý aýdandyq polıtsııa basqarmasy ıývenaldy polıtsııa bóliminiń ınspektory qaqqan. Ol birneshe kún boıy polıtsııada esepte turǵan 41 jastaǵy H.esimdi azamatshanyń otbasyn tekserýge árekettenip keledi.

«Bul otbasyn bıylǵy jyldyń mamyr aıynda tirkedik, balalardyń anasy Pavlodardan kelgen. Tekserý kezinde áıel baılanysqa shyǵýǵa qulyqsyz boldy. 8 tamyzda ótken kezekti tekserý barysynda áldeneni sezgendeı boldym: úıde dybystar estilip jatty, biraq esikti eshkim ashpady. Dabyl qaǵyp, oqıǵa ornyna jergilikti ýchaskelik ınspektor, Tótenshe jaǵdaılar departamentiniń qyzmetkerleri men qamqorshylyq ókilderi jetti. Esik kúshpen ashyldy.

Saraptamamen rastalǵandaı, áıel «ortasha dárejedegi» alkogoldi masań kúıde boldy. 2016 jyly týǵan qyz balaǵa, 2018 jyly týǵan ul balaǵa jáne 2020 jyly týǵan taǵy bir ul balaǵa kútim jasalmaǵan. Úıdiń ishi las boldy.

Balalar birden ómirlik qıyn jaǵdaıǵa tap bolǵan balalarǵa qoldaý kórsetý ortalyǵyna jetkizildi», – deıdi Medeý aýdandyq PB ıÝPB kámeletke tolmaǵandar isteri jónindegi ýchaskelik ınspektory Aıjan Býtabaeva.

Medeý aýdandyq polıtsııa basqarmasy basshylyǵynyń aıtýynsha, áıeldi ana quqyǵynan aıyrý úshin is materıaldary jınaqtalyp, 18 tamyzda kámeletke tolmaǵandardyń quqyǵyn qorǵaý komıssııasyna joldanatyn bolady.