Almatyda MÁMS júıesi engizilgeli medıtsınalyq qyzmetter kólemi ulǵaıdy – Tileýhan Ábildaev

ALMATY. QazAqparat – Bıylǵy jyldyń 9 aıynda Medıtsınalyq saqtandyrý qory almatylyqtarǵa saqtandyrý paketi sheńberinde kórsetilgen qyzmetter úshin 37 mlrd teńgege jýyq qarjy tóledi. Bul týraly onlaın brıfıng barysynda Almaty qalasy «Áleýmettik medıtsınalyq saqtandyrý qory» KEAQ fılıalynyń dırektory Tileýhan Ábildaev aıtty, dep habarlaıdy QazAqparat tilshisi.

Fılıal dırektorynyń aıtýynsha, onyń basym bóligi statsıonarda kórsetilgen medıtsınalyq qyzmetterge tıesili – 19,4 mlrd teńge.

«Mindetti áleýmettik medıtsınalyq saqtandyrý júıesi engizilgennen beri 9 aıdyń qorytyndysy boıynsha medıtsınalyq qyzmetter kóleminiń ulǵaıǵanyn baıqaýǵa bolady. Mysaly, buǵan deıin halyqtyń qaltasy kótere bermeıtin qymbat dıagnostıka men operatsııalar endi medıtsınalyq saqtandyrý qory arqyly qol jetimdi boldy», - dep atap ótti Tileýhan Ábildaev.

Sonymen qatar, ol 6,5 mlrd teńge KT/MRT syndy taǵy da basqa konsýltatıvtik-dıagnostıkalyq qyzmet túrlerine tólengenin jetkizdi.

«Sondaı– aq, 5,9 mlrd teńge joǵary tehnologııalardyń kómegimen jasalatyn medıtsınalyq qyzmetterge, 2,2 mlrd tenge statsıonardy almastyratyn kómekke jumsaldy.Qalǵan qarjy profılaktıkalyq tekserýlerge, medıtsınalyq reabılıtatsııa jáne qalpyna keltirýge baǵyttalǵan em-dom úshin tólendi»,– dedi ol.