Almatyda Mámbet Qoıgeldiniń jańa kitaby tanystyryldy

ALMATY. QazAqparat – Ulttyq kitaphanada tarıhshy, professor Mámbet Qoıgeldiniń «ıA sebıa sovershenno ne prıznaıý vınovnym!» atty kitabynyń tusaýkeser rásimi ótti, dep habarlaıdy QazAqparat tilshisi.

Atalǵan jınaqqa 1960-1980 jyldary Sovettik rejımge qarsy shyqqan adamdar jaıly derekter engen. Olardyń kóbi kezinde KSRO Bas prokýratýrasynyń, qazirgi Reseıdiń Federaldyq qaýipsizdik qyzmeti arhıvinde saqtalǵan qujattar.

«Bul kitapqa Mahmet Qulmaǵambet, Qojan Ahmetov jaıly derekter endi. Reseı arhıvinde osy eki kisi jaıly derek óte kóp jınalypty. Máskeýde Azamat Jaqybaevqa qatysty qujattar bar eken, alaıda ony bermedi. Biraq osy ýaqytqa deıin jabyq bolǵan ózge qujattardy berdi», - deıdi tarıhshy Mámbet Qoıgeldi.

Tarıhshynyń aıtýynsha, kitaptaǵy tyń derekterdi Reseıdiń memlekettik arhıvinen tapqan.

«Arhıvte Mirjaqyp, Ahmet týraly derekterdiń bári saqtalǵan. Biz 1960-1980 jyldary Sovet úkimetine qarsy shyqqan jandarǵa qatysty derek izdedik. Reseılikter qazaqtar Sovettik júıege eshqashan qarsylyq tanytqan joq deıdi. Qazaqstan Odaqtyń ydyraýyna qarsy boldy dep jazady. 1960-1980 jyldardaǵy bul qujattar bizde de ortalyq júıege qarsy narazylyq bolǵanyn kórsetedi. Qazaqstanda azamattyq qozǵalys boldy, Táýelsizdik úshin qozǵalys esh ýaqytta toqtaǵan emes. Mahmet Qulmaǵambet basy daýǵa qalyp Batys eline ketip, sol jaqta kóz jumdy. «ıA sebıa sovershenno ne prıznaıý vınovnym!» degen sol kisiniń sotta aıtqan sózi», - deıdi Mámbet Qoıgeldi.