Almatyda mamandandyrylǵan eki HQO ashyldy
Mamandandyrylǵan jańa HQO-ny ashý - kólik quraldaryn tirkeýge, qaıta tirkeýge jáne kólik júrgizýshisi kýáligin aýystyrýǵa nıetti azamattar sanynyń artýynan týyndap otyr.
«Azamattarǵa arnalǵan úkimet» memlekettik korporatsııasynyń Almaty qalasy boıynsha fılıalynyń dırektory Ǵalym Qarqynbaevtyń aıtýynsha, alǵashqy mamandandyrylǵan HQO ashylǵaly beri 5 jyldyń ishinde avtokólik ıelerine kórsetiletin qyzmet kólemi bes ese artqan.
«Qala shekarasynyń keńeıýine baılanysty Almaty qalasy halqynyń sany bir jarym ese ósti. Sondaı-aq memlekettik tirkeý nómirin berý boıynsha eksterrıtorıaldy qaǵıdasy engizilgennen keıin kólik sany arta túsken. Tirkeletin transporttyń 50% ózge qalalardan kelgen qyzmet alýshylar rásimdeıdi. Olardyń 80% - Almaty, 20% - Túrkistan jáne Jambyl oblystarynyń turǵyndary. Bul Saıaly shaǵyn aýdany men Maılın k-si, 85 mekenjaıynda ornalasqan mamandandyrylǵan HQO-lar júktemesin kóbeıtti», - deıdi Ǵalym Qarqynbaev.
Sondaı-aq ol kólik júrgizýshisi kýáligin alý barysynda tapsyrylatyn emtıhan burynǵydaı Alataý aýdanynda ornalasqan №1mamandandyrylǵan HQO-da júrgiziletinin jetkizdi.
Sybaılas jemqorlyqqa jol bermeý jáne memlekettik qyzmetterdi kórsetý úrdisin jetildirý maqsatynda «Elektrondyq úkimet» portalynda kólikterdi tirkeý jáne kólik júrgizýshisi kýáligin almastyrý qyzmetteri boıynsha servıster jumys isteıdi. Tıisti qujattar bir saǵat ishinde rásimdeledi.
Búginge deıin elektrondyq úkimet portaly arqyly úsh myńnan astam kólik tirkeýge qoıylǵan (Almaty qalasynda 550), sondaı-aq 13 myńǵa jýyq azamat (Almaty qalasynda 1765) kólik júrgizýshisi kýáligin jańasyna almastyrdy.
Mamandandyrylǵan jańa HQO-lar Naýryzbaı aýdanynyń Shuǵyla shaǵyn aýdany 347/2 meken jaıynda jáne Jetisý aýdanynyń Qulager shaǵyn aýdany, Serikov kóshesi 6a meken jaıynda ornalasqan.