Almatyda mádenıet jáne óner salasynyń úzdik qyzmetkerleri marapattaldy

ALMATY. QazAqparat - Búgin Abaı atyndaǵy ulttyq memlekettik akademııalyq opera jáne balet teatrynda mádenıet jáne óner qyzmetkerlerin marapattaý rásimi ótti, dep habarlaıdy QazAqparat tilshisi.

Sharaǵa QR Mádenıet jáne sport mınıstri Aqtoty Raıymqulova qatysty. Mınıstr elimizdiń mádenıet jáne óner salasy qyzmetkerlerin kásibı merekesimen quttyqtap, birqatar óner adamdaryna «Mádenıet salasynyń úzdigi» tósbelgisi men «Qurmet» gramotalaryn tabystady.

«Mýz-Art» tobynyń qurylǵanyna 20 jyl tolýyna oraı, Aqtoty Raıymqulova top múshelerine Elbasy - Qazaqstannyń Tuńǵysh Prezıdenti Nursultan Nazarbaevtyń quttyqtaý hatyn oqyp berdi.

Aıta keteıik, 21 mamyr – Mádenıet jáne óner qyzmetkerleriniń kúni. Ataýly kún Tuńǵysh Prezıdent – Elbasy Nursultan Nazarbaevtyń Jarlyǵyna saı 2013 jyldan bastap toılanyp keledi.

«Sońǵy jyldary mádenıet salasyndaǵy qyzmetkerlerdiń ál-aýqaty jaqsardy, jalaqy kóterildi, sala qyzmetkerlerin yntalandyrý, ıaǵnı azamattarymyzdyń laıyqty ómirin qamtamasyz etý - jumystyń basty basymdyǵy», - dedi mınıstr.

Sonymen qatar, Aqtoty Raıymqulova kitaphana, mýzeı, mádenı-demalys salasyndaǵy qyzmetkerlerdiń kásibı sheberlikterin qoldaý jáne oblystyq mádenıet uıymdarynyń ımıdjin kóterý maqsatynda uıymdastyrylǵan «Rýhanı Qazyna-2021» IV festıvali búgin aıaqtalǵanyn atap ótti.

«Elimizdiń 15 óńirinen 300-den astam ótinish tústi. Eń úzdik memlekettik, oblystyq, aýdandyq, aýyldyq mańyzy bar mýzeı, kitaphana, mádenı-demalys uıymdary qyzmetkerlerine aqshalaı syılyq tabystalady»,-dedi mınıstr.