Almatyda lokdaýn qandaı jaǵdaıda engiziledi

ALMATY. QazAqparat -Almatynyń bas sanıtar dárigeri Jandarbek Bekshın onlaın brıfıng barysynda qalada qandaı jaǵdaıda lokdaýn engizilýi múmkin ekenin aıtty, dep habarlaıdy QazAqparat tilshisi.

«Búgin bizdiń kezdesýimiz lokdaýnǵa jol bermeý úshin jasaldy. Búgin tósek-oryndardyń sanyna qaraımyz, qazir olardyń 50 paıyzy bos emes, kórip otyrǵandaryńyzdaı, tósekter jetkilikti. Bizde áli de 4 myńǵa jýyq tósek-oryn qory bar, olardy qajet jaǵdaıda tarta alamyz. Bizdiń mindetimiz – barlyq deńgeıde medıtsınalyq kómek kórsete alýymyz úshin densaýlyq saqtaý júıesiniń kúıreýin boldyrmaý», - dedi ol.

Sonymen qatar, ol táýligine 500-den asa patsıent aýrýhanaǵa jatsa, tolyq lokdaýn máselesi qaralatynyn jetkizdi.

Buǵan deıin habarlaǵanymyzdaı, Almatyda koronavırýsqa baılanysty epıdemıologııalyq ahýaldyń kúrdelenýine baılanysty 20-28 naýryz aralyǵynda karantın talaptary kúsheıtildi. Osyǵan oraı, avtobýstyń qozǵalys rejımi ózgerdi.

Sondaı-aq juǵý qaýpi 70 paıyzǵa joǵary koronavırýstyń jańa shtamdary tekserilip jatqany týraly málim etildi.