Almatyda lańkestik áreket saldarynan qaza tapqan polıtsııa qyzmetkeri T. Begasylovty jerleý rásimi 21 shildede bolady
Bul týraly «QazAqparat» tilshisine Almaty qalalyq ІІD resmı ókili Saltanat Ázirbek málim etti.
«Shamamen jerleý rásimi 21 shildede Tımýr Begasylovtyń týǵan qalasy Esikte bolady», - dedi ol.
Esterińizge sala ketelik, T. Begasylov búgin aýrýhanada kóz jumdy.
«Búgin, 2016 jyldyń 19 shildesi kúni, 13 saǵat 45 mınýtta Almaty qalalyq jedel shuǵyl kómek kórsetý aýrýhanasynyń jansaqtaý bóliminde 1986 jyly 15 shildede týǵan, Jol-patrýldik polıtsııasynyń mamandandyrylǵan batalony qyzmetiniń aǵa ınspektory Tımýr Begasylov qaıtys boldy.
Ol Abaı dańǵyly boıynda Jol-patrýldik polıtsııasynyń mamandandyrylǵan batalony ekıpajynyń quramynda qyzmet babynda bolǵan. R. Kúlekbaevtyń quqyqqa qarsy áreketine toıtarys berý barysynda oq tıip jaraqat aldy.
Sóıtip, Almaty qalalyq jedel shuǵyl kómek kórsetý aýrýhanasyna óte aýyr halde jetkizildi. Dárigerler jas tártip saqshysynyń ómirin aman alyp qalý úshin qoldan kelgenniń barlyǵyn jasady.
Aıta ketelik, polıtsııa leıtenanty Tımýr Tileýuly Begasylov ishki ister salasynda 2015 jyldyń qańtar aıynan beri jumys istep kelgen», - delingen Almaty qalalyq ІІD habarlamasynda.