Almatyda «qyzyl» mártebesi bar 2886 turǵyn oqshaýlaý rejımin buzǵany úshin jaýapqa tartyldy

ALMATY. QazAqparat - Úı karantınindegi almatylyqtar ózin-ózi oqshaýlaý sharttaryn qatań saqtamaıdy. Bul týraly baspasóz máslıhatynda Almaty qalasy sanıtarlyq- epıdemıologııalyq baqylaý departamenti basshysynyń orynbasary Sádýaqas Baıǵabylov aıtty, dep habarlaıdy QazAqparat tilshisi.

«Qyzyl» jáne «sary» mártebesi bar azamattar kóshege shyǵyp qana qoımaı, saýda-oıyn-saýyq ortalyqtaryna, kınoteatrlarǵa, meıramhanalarǵa kirýge, tipti áýe saparlaryn jasaýǵa tyrysady.

«Karantın men oqshaýlaý rejımin saqtaý árkimniń azamattyq mindeti. Ókinishke oraı, árkim óziniń densaýlyǵy úshin, basqalardyń ál-aýqaty úshin jaýap berýge daıyn emes. 9 sáýirden bastap biz «qyzyl» mártebesi bar 10 777 adamdy jáne «sary» mártebesi bar 1269 adamdy anyqtadyq. Onyń ishinde ózin - ózi oqshaýlaý rejımin buzǵan «qyzyl» mártebesi bar 2886 turǵyn ákimshilik jaýapkershilikke jáne 30 AEK mólsherinde aıyppul tóleýge tartyldy», - dedi S. Baıǵabylov.

Sanıtarlyq dárigerdiń aıtýynsha, Ashyq jobasyn engizýdiń negizgi maqsaty - juqtyrǵan nemese baılanysta bolǵan adamdardyń qoǵamdyq oryndarǵa barýyn boldyrmaý. Búgingi tańda Ashyq qosymshasyn ǵana emes, sonymen qatar, Aitu platformasy men birneshe bankti de paıdalanýǵa bolady.

Sonymen qatar, qalada monıtorıngtik toptar qarqyndy jumys isteýde. Almatynyń sanıtarlyq dárigeriniń málimetinshe, bıyl 44 myńnan astam nysan tekserilip, 4 300-den astam nysan buzylǵan.

«Karantındik shekteý talaptaryn buzǵany úshin 747 zańdy tulǵaǵa 260,7 mln teńge kóleminde aıyppul, maska rejımin buzǵany úshin 5870 turǵynǵa 258,3 mln teńgege aıyppul salyndy», - dedi S. Baıǵabylov.

Ákimshilik sottardyń sheshimi boıynsha karantındik sharalardy qasaqana buzǵan 44 obektiniń qyzmeti toqtatyldy, sottarda taǵy jeti is qaralýda.

Sonymen qatar, qoǵamdyq kólikterge, áýejaı men temirjol vokzalynyń aýmaǵyna tekseris júrgizilýde.