Almatyda qyzmet kórsetetin medıtsına uıymdarynan 224 mln teńgeniń kemshilikteri anyqtaldy

NUR-SULTAN. QazAqparat - Medıtsınalyq saqtandyrý qory 2019 jyldyń alty aıynda respýblıka turǵyndaryna kórsetilgen tegin medıtsınalyq kómek sapasyn baqylaý jumystarynyń nátıjesin shyǵardy. Monıtorıng nátıjesinde Almaty qalasy boıynsha 224 mln teńgege jýyq qyzmettiń túrli kemshiliktermen kórsetilgeni anyqtaldy. Bul týraly «QazAqparat» HAA «Áleýmettik medıtsınalyq saqtandyrý qory» KEAQ Almaty fılıalyna silteme jasap habarlaıdy.

Málimetke qaraǵanda, kemshiliktiń basym bóligi statsıonarlyq jáne statsıonardy almastyratyn kómek uıymdaryna tıesili. Monıtorıng nátıjesinde olardan 211,4 mln teńgeden astam qarjy qaıtaryp alynǵan. Konsýltatıvtik-dıagnostıkalyq kómek uıymdary 1,3 mln teńgeniń qyzmetin kemshilikpen kórsetkeni belgili boldy. Qalǵan 11,2 mln teńgeden astam aıyppul jedel járdem, qan qyzmeti men patologoanatomııalyq qyzmet sýbektilerine salyndy.

Jalpy, 2019 jyldyń bastapqy alty aıynda respýblıka boıynsha 2,8 mlrd teńgeniń qyzmeti túrli kemshiliktermen kórsetilgen.

«Monıtorıng barysynda anyqtalǵan kemshilikterdiń deni emdeý-dıagnostıka sharalaryn júrgizý barysynda belgilengen standarttardan aýytqý, medıtsınalyq qujattardy durys toltyrmaý, qyzmet baǵasyn negizsiz ósirý syndy olqylyqtarǵa qatysty bolyp otyr. Sonymen qatar, kórsetildi dep jazylǵan belgili bir qyzmet túrleriniń shyn máninde atqarylǵanyn rastaı almaǵan klınıkalar da bar», – dedi MSQ Almaty fılıalynyń Medıtsınalyq qyzmet sapasyn baqylaý bólimi basshysy Ásem Manapbaeva.

Onyń aıtýynsha, qazirgi tańda monıtorıng menshik quqyǵyna qaramastan, memlekettik tapsyrys alǵan barlyq medıtsına uıymdarynda júrgiziledi. Jyl basynan beri saraptamanyń úsh deńgeıli úlgisi qoldanysqa engizildi. Naqtyraq aıtqanda, adam ólimi bolǵan jaǵdaıda saraptama emhanalyq-ambýlatorlyq kómek, jedel járdem jáne statsıonar deńgeıinde (syrqattyń em-dom alý úshin júrip ótken marshrýty boıynsha) jasalyp, jiberilgen kemshilikterdiń ózara baılanysy anyqtalady.

Esterińizge sala ketsek, Almaty qalasynda 178 medıtsına uıymy memlekettik tapsyrys sheńberinde halyqqa tegin kómek kórsetip jatyr. Olarmen bekitilgen kelisimsharttyń jalpy somasy 114,6 mlrd teńgeden asady.