Almatyda qyzanaqty topyraqsyz ósiretin boldy

 ALMATY. QazAqparat - Almatyda qyzanaq ósiretin jylyjaı kesheniniń qurylysy bastalady. Aýdany 8 gektardy quraıtyn jańa nysan Alataý aýdany Indýstrııaldy aımaǵynyń aýmaǵynda ornalaspaq. Osy jáne ózge de 5 ınnovatsııalyq jobany búgin óńirlik úılestirý keńesi maquldady, dep habarlaıdy QazAqparat tilshisi.

Joba avtorlarynyń aıtýynsha, qyzanaqtardyń sapasy óte joǵary bolady. Óıtkeni, óndiriste gollandııalyq jabdyqtar paıdalanylmaq. Jylyjaı kesheninde kókónister jyl boıy úzdiksiz «gıdroponıka» tásilimen, ıaǵnı, topyraqsyz ósiriletin bolady.

Kóshetke qosymsha jaryq berý, tumandatý, perdeleý júıesi, sebelep sýarý sekildi birqatar ınnovatsııalyq tásilderdi qoldaný da qarastyrylǵan.

Sondaı-aq, paıdalanylǵan sýdy tazartý júıesi kózdelgen. Ol sý shyǵynynyń eki esege jýyǵyn únemdeýge múmkindik beredi. Jylyjaıda jylyna 5 000 tonnadan astam qyzanaq ósiriledi.

Jańa kásiporyn iske qosylǵanda 105 turaqty jumys orny ashylady.

Mamandardyń aıtýynsha, buǵan deıingi kóptegen jylyjaılarda eskirgen tehnologııalar qoldanylǵan. 1970-1990 jyldardaǵy jylyjaılarda kókónister sáýirden qazanǵa deıingi ýaqytta ósirilip otyrǵan. Naqtyraq aıtqanda, qys aılarynda qyzanaq shetelden jetkizilip kelgen.

Sondaı-aq, úılestirý keńesi «QQJZ - Qazaqstan qubyr jelisi jabdyqtarynyń zaýyty» JShS-nyń japqysh armatýra óndirisi jobasyn da tanystyrdy.

Innovatsııalyq jobany ındýstrııaldyq aımaqta júzege asyrý ónim kólemin 2 esege arttyrýǵa, sondaı-aq qosymsha 150 jumys ornyn qurýǵa múmkindik beredi.

Sarapshylar talqysyna túsken kelesi joba tońazytylǵan qamyr óndirisi boldy.

«GROUPNAK 8» JShS nan-toqash ónimderiniń óndirisinde nemis tehnologııasyn paıdalanatyn bolady.

Kásiporyn jylyna 720 tonna tońazytylǵan qamyr shyǵaryp, qara jáne aq, Ciabata ıtalıan nany, frantsýz bagetteri, qytyrlaq nan, ishine tátti salynǵan bólkeler, frantsýz krýassandary, kekster jáne maffına pisirmek.

Sondaı-aq, ındýstrııaldyq aımaqqa «Úlgi Qurylys» plastıkalyq terezeler óndirisi, «Garant Beton» JShS avtoklavty gazdy beton óndirisi, «QazMonolıt Grýpp» JShS metall aýa qubyrlary óndirisi endi.