Almatyda kúzde COVID-19 patsıentterine 7,7 myń oryn daıyndalady
Bul kúzgi-qysqy kezeń bastalǵanǵa deıin qosymsha tósek-oryndarǵa qajettilik ósken jaǵdaıda aldyn-ala jasalady. Belgili bolǵandaı, pandemııany toqtatýdyń eń tıimdi eki joly bar – bul qoldanystaǵy shekteý sharalary jáne tósek-oryn sanyn arttyrý.
Pandemııa bastalǵaly beri ınfektsııalyq statsıonarlardyń sany 2-den 26-ǵa deıin (500 tósek-orynnan 6 096 deıin) ósti. Kúzde COVID-19 sımptomdary bar 7 700 patsıentke statsıonarlyq emdeýdi bir mezgilde qamtamasyz etý josparlanyp otyr.
«Aldaǵy kúnderi jańa COVID-19 statsıonarlary ashylady. Olardy aldyn-ala sanıtarlyq-epıdemıologııalyq aýdıtten ótken, densaýlyq saqtaý obektileriniń bazasynda ashamyz. Qazirgi ýaqytta jaýapty mamandar qurylys jumysyn júrgizip jatyr. Olardyń ishinde 250 orynǵa shaqtalǵan «Qazaqstan», 376 oryndyq «Kóktem», 140 oryndyq «Samal» pansıonaty, 230 oryndyq «Astana» qonaq úıi, 360 oryndyq QazATK jataqhanasy, 100 oryndyq UOS múgedekterine arnalǵan respýblıkalyq klınıkalyq gospıtal, 500 orynǵa shaqtalǵan Arnaýly áleýmettik qyzmet kórsetý ortalyǵy bar. Bul jańa statsıonarlar jumys istep turǵan nysandarǵa qosymsha tamyz aıynyń sońyna deıin kezeń-kezeńimen iske qosylatyn bolady», - dedi B.Saǵyntaev.
Sonymen qatar ákimdik ana men balanyń densaýlyǵyn qorǵaýǵa erekshe kóńil bóledi. Barlyq áıel-ananyń búgingideı pandemııa kezeńinde qaýipsiz jaǵdaıda bosanýy, bosanǵanǵa deıin jáne bosanǵannan keıin de úzdiksiz kútimde bolýy asa mańyzdy.
Qalada 45 tósek-oryndy №4 perzenthana jumys isteıdi. Jaqyn arada osy perzenthananyń 60 tósek-orynǵa arnalǵan jańa korpýsy iske qosylady. Sonda mundaǵy jalpy oryn sany 105-ke jetedi.
Patsıentterdi shuǵyl ornalastyrý úshin ýaqytsha statsıonarlar bolý múmkindigi bar degen obektilerge kúndelikti monıtorıng júrgiziledi.
«Búgingi tańda biz buǵan deıin eshqashan jasalmaǵan sharalardy qolǵa aldyq. Shuǵyl ári óte qysqa merzimde aýqymdy jańa statsıonarlar ashyp, olardy qajetti barlyq tehnıkamen jabdyqtaýdamyz. Ǵımarattardyń bólmelerin qaıta josparlap, shlıýzder men oqshaýlanǵan bokstar qurylýda. Barlyq deńgeıdegi medıtsınalyq kómek kórsetýdiń tıimdiligin arttyrý úshin densaýlyq saqtaý júıesine ózgerister engizýdemiz», - dedi qala ákimi.