Almatyda qurylysy aıaqtalmaǵan 2 kópqabatty úı buzylady
11:11, 06 Qazan 2022
ALMATY. QazAqparat - Almatynyń «Zerdeli» shaǵynaýdanynda qısaıyp ketken 7 kópqabatty úıdi qaıta qalpyna keltirý jumystary jyl sońyna deıin aıaqtalady. Sondaı-aq salynyp bitpegen 2 kópqabatty úı buzylady. Bul týraly qala ákimi Erbolat Dosaev málim etti, dep habarlaıdy QazAqparat tilshisi.
«Zerdeli» shaǵynaýdanynda problemaly 32 úı bolǵan. Búgingi kúnge irgetasy nyǵaıtylmaǵan 7 kópqabatty úı qalǵan edi. Olar jyl sońyna deıin qaıta qalpyna keltiriledi», - dedi Erbolat Dosaev Alataý aýdany turǵyndarymen kezdesý barysynda.
Aıtýynsha, nyǵaıtý jumystary «Qazaq qurylys jáne sáýlet ǵylymı-zertteý jáne jobalaý ınstıtýtynyń» jobalyq sheshimderine sáıkes qatań túrde júrip jatyr.
«Sonymen qatar osy aýdandaǵy qurylysy aıaqtalmaǵan 2 kópqabatty úıdi buzý týraly «QazQSǴZI» AQ qorytyndysy bar. Merdigermen shartqa qol qoıyldy, jyl sońyna deıin bul úıler buzylady. Osy jerde turǵyndar talqylaýynan keıin skver salynady dep oılaımyz»,- dedi shahar basshysy.