Almatyda qurylys salasynda myńǵa jýyq buzýshylyq anyqtaldy

ALMATY. QazAqparat – Almatyda jyl basynan beri qurylys nysandaryna 740 jospardan tys tekserý júrgizildi. Nátıjesinde bir myńǵa jýyq buzýshylyq anyqtaldy. Bul týraly óńirlik kommýnıkatsııalar qyzmetiniń brıfınginde qala qurylysyn baqylaý basqarmasy basshysynyń orynbasary Oljas Tólebaev aıtty, dep habarlaıdy QazAqparat tilshisi.

Spıkerdiń málimetinshe, qala aýmaǵynda 823 qurylys júrip jatyr. Bıýdjet esebinen 240 nysan, 583 kommertsııalyq. Onyń 155 turǵyn úı kesheniniń qurylysy. Oǵan 383 qurylys kompanııasy men 138 tehnıkalyq qadaǵalaý uıymy jumyldyryldy.

«Baqylaý fýnktsııalary sheńberinde 2023 jyly 740 jospardan tys tekserý júrgizildi, jalpy somasy 187 mln teńgege ákimshilik aıyppul salynydy. 956 buzýshylyq anyqtaldy», - deıdi ol.

Aıtýynsha, buzýshylyqtardy joıýǵa 779 nusqama berildi. Sapasyz qurylys jáne qurylys-montajdaý jumystaryn júrgizgeni úshin 312-bap boıynsha 35,7 mln teńgege 47 merdiger uıym jaýapqa tartyldy. Bıyl sottarǵa zańsyz salynǵan obektilerdi buzý týraly 53 talap-aryz joldandy. Zańsyz salynǵan 19 nysan buzyldy. 20 qurylys ýaqytsha toqtatylyp 247 lıtsenzııanyń kúshi joıyldy.

«Búgingi tańda sáýlet-qurylys baqylaý organdary ınspektsııalaý sheńberinde obektige kedergisiz kirý quqyǵynan aıyrylǵany jáne tekserýler QR Kásipkerlik kodeksine sáıkes resmı ótinishter negizinde ǵana júrgiziletini belgili. Almaty qalasy ákiminiń bastamasy boıynsha Prezıdenttiń qoldaýymen tekserý júrgizý tártibin qaıta qaraý jáne salynyp jatqan obektilerge baqylaýdy kúsheıtý jóninde túzetýler engiziledi. Tıisti zań jobasy Parlamenttiń qaraýyna jiberildi», - dep atap ótti ol.

Sondaı-aq, spıker jyljymaıtyn múlik satyp alýdy josparlap otyrǵan Almaty turǵyndaryna júgindi.

«Jyljymaıtyn múlikti satyp almas buryn salynyp jatqan turǵyn úı keshenderiniń qujattarynyń tolyq paketin qala qurylysyn baqylaý basqarmasynyń jedel jelisiniń [phone] WhatsApp nómiri boıynsha tekserý qajet», - dedi Oljas Tólebaev.