Almatyda qurylys nysandarynyń jer silkinisine beriktigi tekserilýde

ALMATY. QazAqparat - Almatyda ǵımarattardy pasporttaýdyń ekinshi kezeńi bastaldy. Bul týraly Qazaqstandyq qurylys jáne sáýlet ǵylymı-zertteý jáne jobalaý ınstıtýtynyń («QazQSǴZI» AQ) baspasóz qyzmeti málimdedi, dep habarlaıdy QazAqparat tilshisi. 

Jobalaý ınstıtýnynyń aıtýynsha, «Almatyny pasportaý» jobasynyń aıasynda qaladaǵy 3 myńnan asa ǵımarat jaǵdaıy tekseriledi.

Sertıfıkattaýdyń ekinshi kezeńine balabaqshalar, mektepter men aýrýhanalar, qoǵamdyq mekemeler sııaqty áleýmettik nysandar men kóp qabatty turǵyn úıler kiredi.

«Ǵımarattardyń seısmıkalyq turaqtylyǵyn jáne beriktigin baǵalaý eki kezeńnen turady. Birinshi kezeń - elektrondyq pasportty qurastyrý. Vızýaldy tekserý nátıjesindegi derekter kúndelikti GIS baǵdarlamasynyń (gdb, shp, xml) elektrondyq derekqoryna engiziledi . Bul obektiler jergilikti koordınat júıesine bekitiledi. Ekinshi kezeń - ǵımarattardyń syrtqy jaǵdaıyn tekserip, kóp páterli úıler serııasynyń tıpterin, salyný qurylysyn anyqtaýdan turady»,-delingen habarlamada.

Pasporttaý jer silkinisi, sel jáne basqa da tabıǵı apattardan qalany qorǵaýdyń túrli josparyn qurýǵa múmkindik beredi. Sertıfıkattaý aıaqtalǵannan keıin árbir obektige elektrondy tólqujat beriledi. Ol  ǵımaratty tıimdi paıdalaný jáne jóndeý jumystaryn júrgizý kezinde kerek bolady.

«2017 jyly QazQSǴZI sarapshylary 7027 nysannyń jaǵdaıyn tekserip, olardyń árqaısysyna elektrondy pasport berdi. Qujatta kóp páterli úılerdiń ishin qaıta josparlaý, qabyrǵalardy aýystyrýdyń nusqaýlyǵy jazylǵan. Súrilmeıtin, paıdalanýǵa jaramdylyǵy týraly anyqtama da bar»,- dedi  QazQSǴZI óndiris jónindegi basqarýshy dırektory Eraly Shoqparov.

Eske sala keteıik, 31 tamyz kúni Almatyda 4 baldyq jer silkindi.