Almatyda qurylys ındýstrııasyndaǵy otandyq óndirýshilerdiń úlesi artady
Jergilikti qamtýdy baqylaý jónindegi komıssııanyń keńeıtilgen otyrysynda Almaty qalasy ákiminiń orynbasarlary Maqsat Qıqymov, Muhıt Ázirbaev, Almaty qalasy kásipkerler palatasynyń óńirlik keńesiniń ókilderi, bıýdjettik baǵdarlamalar ákimshileri, bas merdigerler men kásipkerlerdiń qatysýymen memlekettik satyp alý kezinde otandyq qurylys materıaldaryn óndirýshilerine jan-jaqty qoldaý kórsetý týraly sheshim qabyldandy.
Almaty kásipkerler palatasynyń dırektory Aıtýar Qoshmambetovtyń aıtýynsha, búgingi tańda qurylys salasyndaǵy ónerkásiptik kásiporyndar tolyq qýatyna júktelmegen.
Sonymen qatar, ol qurylys materıaldaryn satyp alý kezinde jergilikti óndirýshilerdi qoldaý kerektigin atap ótti.
Aıtýar Qoshmambetovtyń aıtýynsha, Qazaqstanda tıisti óndirister nemese kólemder bolmaǵan kezde ǵana ımporttyq qurylys materıaldaryn satyp alýǵa ruqsat beretin túzetýler «Tapsyrys berýshiniń (qurylys salýshynyń) qyzmetin uıymdastyrý jáne fýnktsııalaryn júzege asyrý qaǵıdalaryn bekitý týraly» zańǵa 2015 jyly engizilgen.
Alaıda, merdiger uıymdar sheteldik óndirýshilerdiń taýarlaryn satyp alýdy jalǵastyryp otyr.
Otyrys barysynda bas merdigerlerdiń, tapsyrys berýshilerdiń qatysýymen otandyq óndirýshilermen keńes ótkizý týraly sheshim qabyldandy.
Kezdesý qorytyndysy boıynsha Almaty qalasynyń ákimdigi men Almaty qalasy kásipkerler palatasynyń óńirlik keńesi arasynda turaqty áriptestik qatynastardy jolǵa qoıý jónindegi memorandýmǵa qol qoıyldy.